ރާއްޖޭގެ އިގްތިސާދު ކުރިއަރުވައި ތަރައްގީކުރުމުގެ ގޮތުން، ދެމެހެއްޓެނިވި ވިޔަފާރީގެ އުސޫލުން، އަސާސީ ތަކެތި ހެޔޮ އަގުގައި މުޅި ރާއްޖެއަށް ފޯރުކޮށްދިނުމަށް ސަރުކާރުން ކުރަމުންދާ މަސައްކަތުގެ ދަށުން، ދެމެހެއްޓެނިވި ލޮޖިސްޓިކްސް ނެޓްވޯކެއްގެ ހިދުމަތް ދިނުމަށް މޯލްޑިވްސް ޕޯޓްސް ލިމިޓަޑް (އެމް.ޕީ.އެލް) އިން “މޯލްޑިވްސް ނޭޝަނަލް ލޮޖިސްޓިކްސް” ގެ ނަމުގައި ހިދުމަތެއް ތައާރަފްކޮށްފި އެވެ.
އެގޮތުން، މި ހިދުމަތް ހުޅުމާލޭ ސެންޓްރަލް ޕާކުގައި މިހާރު ކުރިއަށްދާ “މޯލްޑިވްސް މެރިން އެކްސްޕޯ 2026” ގެ ތެރެއިން، ރަސްމީކޮށް އިފްތިތާހް ކޮށްދެއްވާފައި ވަނީ ފައިނޭންސް މިނިސްޓަރު މޫސާ ޒަމީރެވެ.
މި ހިދުމަތުގެ މައިގަނޑު މަގުސަދަކީ ރައްޔިތުންނަށް ބޭނުންވާ އަސާސީ މުދަލާއި ކާޑުގެ ބާވަތްތައް ރާއްޖޭގެ އެކި ސަރަޙައްދުތަކުގައި ގާއިމުކޮށްފައިވާ ގުދަންތަކަށް ދަތިކަމެއް ނެތި ފޯރުކޮށްދިނުމެވެ. މީގެ އިތުރުން އަސާސީ މުދާލާއި އަދި ސަރުކާރުން ކަނޑައަޅާފައިވާ ކާޑުގެ ބާވަތްތައް ސަރަޙައްދީ ގުދަންތަކާއި ހަމައަށް ފޯރުކޮށްދިނުމަށްޓަކައި، ޝެޑިއުލްކޮށްގެން ކުރާ ދަތުރުތަކާއި، ކޯލްޑް-ޗެއިން ކެޕޭސިޓީ އިތުރަށް ހަރުދަނާ ކުރުމެވެ. މިއާއެކު، ރާއްޖެއަށް އިމްޕޯޓް އަދި އެކްސްޕޯޓް ކުރާ މުދަލުގެ އިތުރުން، ރާއްޖޭގެ އެކި ކަންކޮޅުތަކަށް މުދާ އުފުލުމާއި، ގުދަންކުރުމާއި، އަދި މުދާ ފޯރުކޮށްދިނުމުގެ ހުރިހާ މަރުޙަލާއެއް އެއް ވިއުގައަކުން ގުޅާލުމަށް ފަރުމާކޮށްފައިވާ ނިޒާމެއް ކަމަށް އެމްޕީއެލުން ވަނީ ބުނެފައެވެ.
މި ހިދުމުގެ ދަށުން އެމްޕީއެލުން އަލަށް ފޯރުކޮށްދިނުމަށް ތައްޔާރު ވަމުންދާ ހިދުމަތްތަކުގެ ތެރޭގައި “ޑޮމެސްޓިކް ޓްރާންސްޝިޕްމަންޓް” ގެ ހިދުމަތް ހިމެނޭ ކަމަށް އެ ކުންފުނިން ވަނީ ބުނެފައެވެ. އެގޮތުން މާލޭ ވިޔަފާރި ބަނދަރަށް އަންނަ ޓްރާންސްޝިޕް ކޮންޓޭނަރުތައް، އެމް.ޕީ.އެލްގެ އުޅަނދުތަކުން ސަރަހައްދީ ބަނދަރުތަކަށް (ހިތަދޫ ޕޯޓް އަދި ކުޅުދުއްފުށީ ޕޯޓަށް) ސީދާ ފޮނުވައިދެވޭނެ އިންތިޒާމް ހަމަޖެހިގެންދާނެ ކަމަށް އެ ކުންފުނިން ބުނެފައިވެއެވެ.
މީގެއިތުރުން، ލޮޖިސްޓިކްސް ސަރވިސްގެ ތެރެއިން ބޭރުން އަންނަ ބޮޑެތި އުޅަނދުފަހަރުތަކަށް އަމާޒުކޮށްގެންދޭ “ސްޓީވްޑޯރިންގ” ހިދުމަތާއި، ބޮންޑެޑް ވެއަރ ހައުސް އަދި “ސީ-ޓު-އެއަރ ކާގޯ” ގެ ހިދުމަތްތައް ވެސް ދަނީ ފޯރުކޮށްދެމުން ކަމަށް އެކުންފުނިން ބުނެފައިވެއެވެ.
އެމްޕީއެލުން އިތުރަށް ބުނިގޮތުގައ ސީ-ޓު-އެއަރ ގެ ކާގޯގެ ހިދުމަތް އިތުރަށް ފުޅާކުރުމުގެ ގޮތުން، މާލޭ ވިޔަފާރި ބަނދަރުން ވެލާނާ އިންޓަރނޭޝަނަލް އެއަރޕޯޓަށް އެލް.ސީ.އެލް މުދާ ހަލުވިކަމާއި ފަސޭހަކަމާއެކު އުފުލައިދިނުމަށް ފަރުމާކުރެވިފައިވާ އާ ހިދުމަތެއް ތައާރަފްކޮށްފައިވާ ކަމަށެވެ. މީގެ އިތުރުން، ބޭނުންވެއްޖެ ހާލަތެއްގައި ބޮންޑަޑް ގުދަނުގައި މުދާ ބެހެއްޓުމުގެ ފުރުސަތުވެސް މި ހިދުމަތުގެ ދަށުން ލިބިގެންދާނެކަމަށް އެކުންފުނިން ބުނެފައިވެއެވެ.
