ސަރުކާރުގެ ކުންފުންޏެއް މެދުވެރިކޮށް 10 ރިސޯޓު ތަރައްގީކުރަން ނިންމަވާފައިވާ ކަމަށް ރައީސުލްޖުމްހޫރިއްޔާ ޑރ މުހައްމަދު މުއިއްޒު ވިދާޅުވެއްޖެ އެވެ.
ރައީސް މިފަދައިން ވިދާޅުވެފައި ވަނީ ރައްޔިތުންގެ މަޖިލީހުގައި ރިޔާސީ ބަޔާން އިއްވަވައި ދެއްވަމުންނެވެ. ރާއްޖޭގައި ފަތުރުވެރިކަމުގެ ސިނާއަތު ރަސްމީކޮށް ފެށިގެން އައީ މީގެ 54 އަހަރު ކުރިން 1972 ވަނަ އަހަރުގަ އެވެ. ނަމަވެސް މި ސިނާއަތަށް ބައި ޤަރުނަށް ވުރެ ގިނަ ދުވަސް ވީ އިރު ވެސް މި ދާއިރާއިން ދިވެހި ހުރިހާ ރައްޔިތުންގެ ޖީބަށް ސީދާ ގޮތެއްގައި އެންމެ ލާރިއެއް ވެސް ލިބޭނެ އެއްވެސް މަގެއް، އެއްވެސް ސަރުކާރަކުން ފަހިކޮށްދީފައި ނެތް ކަމަށް ރައީސް ވިދާޅުވެފައިވެއެވެ.
ރައީސް ވިދާޅުވިގޮތުގައި ރާއްޖޭގެ ގުދުރަތީ އެސެޓްތަކުގެ ހަގީގީ ވެރިންކަމުގައިވާ ދިވެހި ހުރިހާ ލޮބުވެތި ރައްޔިތުންނަށް ސީދާ އާމްދަނީއެއް ލިބޭނޭ މަގެއް، ނިޒާމީ ގޮތެއްގައި ހަމަޖެހިގެން ދިޔުމަކީ އެންމެ އަދުލުވެރި ގޮތް ކަމުގައި އެމަނިކުފާނު ގަބޫލުކުރައްވާ ކަމަށެވެ. އެހެންވެ، މިކަމާ މެދު ކެބިނެޓުގައި މަޝްވަރާކޮށް، ސަރުކާރުން މިހާރު ނިންމާފައިވަނީ، ސަރުކާރުގެ ކުންފުންޏެއް މެދުވެރިކޮށް ކުރިޔަށް އޮތް 3 އަހަރު ދުވަހުގެ ތެރޭގައި މަދުވެގެން 10 ރިސޯޓު ތަރައްގީކުރުމަށެވެ. އަދި އެ ރިސޯޓުތަކުން ލިބޭ ފައިދާގެ ބޮޑުބައެއް، ހަމަ އެއްވެސް ރައްޔިތަކު ބާކީނުކޮށް، ރާއްޖޭގެ ކޮންމެ ރައްޔިތެއްގެ ބޭންކް އެކައުންޓަށް، ހަމަހަމަ ކަމާއެކު، އަހަރަކު އެއްފަހަރު، ބޭރު ފައިސާއިން ޖަމާކޮށްދޭން ނިއްމާފައިވާ ކަމަށް ރައީސް ވިދާޅުވި އެވެ.
އެއާއެކު ރާއްޖޭގެ ކޮންމެ ރައްޔިތަކީ، މި މަޝްރޫއުގެ ދަށުން ތަރައްގީ ކުރެވޭ ހުރިހާ ރިސޯޓެއްގެ ހިއްސާދާރެއްކަމުގައި ހަމަހަމަ ކަމާއެކު، ގާނޫނަކުން ކަނޑައަޅާ ހަމަޖައްސަން ނިންމާފައިވާ ކަމަށް ވެސް ވިދާޅުވި އެވެ. އެކަމުގެ ސަބަބުން، މި މަޝްރޫއު ދަށުން ތަރައްގީ ކުރާ ރިސޯޓުތަކުން ލިބޭ ފައިދާ ދިވެހި ރައްޔިތެއްކަމުގެ އައިޑީކާޑު އޮތް ކޮންމެ ރައްޔިތަކަށް ހަމަހަމަކަމާއެކު އަހަރުން އަހަރަށް ލިބި، ރާއްޖޭގެ ތާރީހުގައި ފުރަތަމަ ފަހަރަށް ދިވެހި ފަތުރުވެރިކަމުގެ ސީދާ ހިއްސާދާރަކަށް ދިވެހި ކޮންމެ ރައްޔިތަކުވެ، ދިވެހި ކޮންމެ ރައްޔިތަކަށް ސީދާ ގޮތުން މާލީ މަންފާ ލިބޭނެއެވެ.އި
ރައީސް އިތުރަށް ވިދާޅުވިގޮތުގައި މި އިންވެސްޓްމަންޓުން ރައްޔިތުންގެ އެކައުންޓަށް ފައިސާ ޖަމާވާން ފަށާނީ 2030 އަހަރުން ފެށިގެން ކަމަށެވެ. އެގޮތުން މި މަޝްރޫގެ ތެރެއިން، އަހަރަކު މަދުވެގެން، 400 އެމެރިކާ ޑޮލަރު ރައްޔިތުންގެ އެކައުންޓަށް ޖަމާވާނެ ކަމަށާއި، 5 މެންބަރުންގެ އާއިލާއެއް ނަމަ، މަދުވެގެން 10 ރިސޯޓުގެ ޝެއަރް ހޯލްޑަރަކަށް ވުމުގެ އިތުރުން، އެ އާއިލާއަށް އަހަރަކު މަދުވެގެން 2000 އެމެރިކާ ޑޮލަރު ލިބިގެންދާނެކަމަށް ލަފާކުރެވޭ ކަމަށް ރައީސް ވިދާޅުވެފައިވެއެވެ.
