މިއަހަރު ތެރޭގައި އިތުރު 17 އިންސްޕެކްޓާ ކުރާފްޓް ހިދުމަތަށް ނެރޭނެކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެއެވެ.
ރައީސް މިފަދައިން ވިދާޅުވެފައި ވަނީ ރައްޔިތުންގެ މަޖިލީހުގައި ރިޔާސީ ބަޔާން އިއްވަވައި ދެއްވަމުންނެވެ. ރައީސް ވިދާޅުވި ގޮތުގައި ދިފާއީ ރައްކާތެރިކަން ދެމެހެއްޓުން ކަށަވަރު ކުރުމަށްޓަކައި މުހިންމު ކުރިއެރުންތަކެއް ހޯދިފައިވާކަމަށެވެ.
އެގޮތުން، މިދިޔަ އަހަރު ދިފާއީ ނިޒާމު ވަރުގަދަ ކުރުމަށްޓަކައި ކުރެވިފައިވާ މަސައްކަތްތަކުގެ ތެރޭގައި ގޯސްޓްގާޑުގެ ހިދުމަތް ރަނގަޅުކުރުމަށްޓަކައި ތުރުކީ ވިލާތުގެ ސަރުކާރުން ވަނީ ހިލޭ އެހީއެއްގެ ގޮތުގައި ސިފައިންގެ ހިދުމަތައް، މިހާތަނަށް ތައާރަފްކުރެވުނު އެންމެ ބޮޑު އަސްކަރީ މަނަވަރު ހަދިޔާކޮށްފައެވެ. އަދި މި މަނަވަރު ވަނީ މިދިޔަ އަހަރު ހިދުމަތަށް ނެރެފަ އެވެ.
ސިފައިން ހިންގާ މެރިޓައިމް ސެކުރިޓީ އޮޕަރޭޝަން ތަކަށާއި، ސާޗް އެންޑް ރެސްކިއު އޮޕަރޭޝަންތަކަށް ބޭނުންވާ އިންސްޕެކްޓާ ކުރާފްޓް ހޯދުމުގެ މަސައްކަތް ފަށައި އޭގެ ތެރެއިން ތިން އުޅަނދު ވަނީ ހިދުމަތަށް ނެރެފައެވެ. މިއާއެކު، މިއަހަރުގެ ތެރޭގައި އިތުރު 17 އިންސްޕެކްޓާ ކުރާފްޓް ހިދުމަތަށް ނެރޭނެކަމަށް ރައީސް ވަނީ ވިދާޅުވެފައެވެ. އަދި ދެ ހާބާރް ކުރާފްޓް ޕެޓްރޯލް ވެސަލް ހޯދުމަށްޓަކައި ޖަޕާން ސަރުކާރުން ފައިސާގެ އެހީ ރާއްޖެއަށް ދިނުމަށް ނިންމާފައިވާކަން ރައީސް ވަނީ ފާހަގަކުރައްވާފައެވެ.
މިއާއެކު، ރާއްޖޭގެ އިގްތިސާދީ ސަރަހައްދު ބެލެހެއްޓުމަށް އޮސްޓްރޭލިޔާ ސަރުކާރުގެ އެހީގައި ހޯދާ މަނަވަރުވެސް މިއަހަރު ހިދުމަތަށް ނެރޭނެ ކަމަށް ރައީސް ވަނީ ވިދާޅުވެފައެވެ.
އެމެއެންޑީއެފްގެ ކެޕޭސިޓީ ވަރުގަދަކުރުމަށް މި ސަރުކާރުން ގިނަ މަސައްކަތްތަކެއް ދަނީ ކުރަމުން ނެވެ. އެގޮތުން އެމްއެންޑީއެފްގެ އެއާކޯގެ އެމްއެންޑީއެފްގެ ފުރަތަމަ އެއާސްޓޭޝަން ވަނީ އައްޑޫ ސިޓީގައި ގާއިމްކޮށް، ހުޅުވާފައެވެ. އަދި އުތުރުގައި އެއާސްޓޭޝަނެއް ގާއިމް ކުރުމަށްޓަކައި ށ. ފުނަދޫގައި އަޅަމުންދާ އެއާސްޓޭޝަން މަސައްކަތް ނިންމައި މިއަހަރު ބޭނުންކުރަން ފަށާނެ ކަމަށް ރައީސް ވަނީ ވިދާޅުވެފަ އެވެ.
މިދިޔަ އަހަރު އެމްއެންޑީއެފްގެ މެރިންކޯއަށް ވަނީ އެންމެ ޒަމާނީ އާމަޑް ވެހިކަލްތައް ހޯދާފައެވެ. މިއަހަރު ތެރޭގަ ވެސް މެރިންކޯގެ ގާބިލްކަން އިތުރުކުރުމަަށް ބޭނުންވާ އާލަތްތައް ހޯދައި، ވަސީލަތްތައް ގާއިމްކުރުމުގެ މަސައްކަތްތައް ދަނީ ކުރިއަށް ގެންދަމުންނެވެ.
އިތުރަށް ރައީސް ވިދާޅުވިގޮތުގައި ސިފައިންނަށް ބޭނުންވާ ތަމްރީނާއި ތައުލީމު ދިނުމުގެ ނިޒާމަށް ޒަމާނީ ބަދަލުތަކެއް ގެންނަންޖެހެއެވެ. އަދި އެކިދާއިރާއިން ސިފައިންގެ ގާބިލްކަން އިތުރުކުރުމުގެ ނިޒާމްތައް އެކުލަވާލަން ޖެހެއެވެ.
