ޒަކާތުގެ އެހީތެރިކަން ފޯރުކޮށްދިނުމުގެ ހިދުމަތްތައް ޑިޖިޓަލައިޒްކުރުމަށް ޓަކައި ޒަކާތު ހައުސްއިން “ޒަކާތް އަސްނާފު ކާޑު” އިފްތިތާހުކޮށްފި އެވެ.
ޒަކާތު އަސްނާފު ކާޑަކީ ޒަކާތުގެ ފައިސާއިން ފޯރުކޮށްދޭ އެހީގެ ޕްރޮގްރާމްތައް މިހާރަށް ވުރެ ހަރުދަނާކޮށް، ލުއިފަސޭހަކަމާ އެކު އަދި އެހީ ލިބޭ ފަރާތްތަކުގެ ކަރާމާތް ހިފެހެއްޓޭނެ ފަދަ ނިޒާމެއްގެ ދަށުން ފޯރުކޮށްދިނުމަށް ޓަކައި، މޯލްޑިވްސް ޒަކާތު ހައުސްއިން ތައާރަފްކޮށްފައިވާ ކާޑެެކެވެ.
އިސްލާމިކް މިނިސްޓްރީގައި ބޭއްވި ރަސްމިއްޔާތެއްގައި މި ކާޑު އިފްތިތާހުކޮށްދެއްވާފައި ވަނީ އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދެވެ.
އަސްނާފު ކާޑަކީ ފަގީރުންނާއި މިސްކީނުންގެ ދަފްތަރުގައި ރަޖިސްޓްރީވެފައިވާ ފަރާތްތަކަށް އަމާޒުކޮށްގެން ތައާރަފުކުރި ކާޑެކެވެ. މިއީ ޒަކާތު ހައުސްގެ ހިދުމަތްތައް ޒަމާނީކޮށް ޑިޖިޓަލައިޒްކުރުމަށް ކުރަމުންދާ މަސައްކަތުގެ ތެރެއިން އެޅުނު މުހިންމު ފިޔަވަޅެއްކަމަށް އިސްލާމިކް މިނިސްޓަރީން ވަނީ ބުނެފައެވެ.
މިނިސްޓްރީން ބުނިގޮތުގައި މި ކާޑުގެ އެހީގައި، އެހީއަށް ޝަރުތުހަމަވާ ފަރާތްތަކަށް ޒަކާތު ހައުސްއިން ފޯރުކޮށްދޭ ތަފާތު ހިދުމަތްތަކާއި، ކުރިއަށް އޮތް ތަނުގައި ތައާރަފުކުރުމަށް ރޭވިފައިވާ އިތުރު ޕްރޮގްރާމްތައް ފަސޭހަކަމާ އެކު ހޯދޭނެއެވެ. އަދި މި ކާޑާ އެކު، އެހީއަށް އެދި ހުށަހަޅާ އިރު ކޮންމެ ފަހަރަކު އަސާސީ ލިޔެކިޔުންތައް ހުށަހަޅަން ޖެހޭޖެހުން ނިމުމަކަށް އަންނާނެކަމަށާއި، އޭގެ ބަދަލުގައި އަސްނާފު ކާޑު ބޭނުންކޮށްގެން އެންމެ ސްކޭނަކުން ވަގުތުން ހިދުމަތް ހޯދޭނެކަމަށް ޒަކާތް ހައުސިނުން ބުނެފައިވެއެވެ. މީގެ ސަބަބުން އިދާރީ މަސައްކަތްތަކާއި ހިދުމަތް އަވަސްވެ، ހިދުމަތް ހޯދާ ފަރާތްތަކަށް ބޮޑު ލުޔެއް ލިބިގެންދާނެކަމަށް ވެސް އެއިދާރާއިން ބުނެފައިވެއެވެ.
މިނިސްޓްރީން އިތުރަށް ބުނިގޮތުގައި، ކިއު.އާރް ކޯޑު ޓެކްނޮލޮޖީ ބޭނުންކޮށްގެން ފަރުމާކޮށްފައިވާ މި ކާޑު، ޒަކާތުގެ އެހީގެ ނިޒާމުގައި ހިމެނޭ އެހީ ލިބޭ ފަރާތުގެ ވެރިފައިޑް ޕްރޮފައިލާ ސީދާ ގުޅިފައިވާނެއެވެ. މީގެ ސަބަބުން ހިދުމަތް ފޯރުކޮށްދޭ ފަރާތްތަކަށް އެހީއަށް ޝަރުތުހަމަވާކަން އަވަހަށް ކަށަވަރުކޮށް، ހާމަކަން ބޮޑު އަދި އިތުބާރު ހުރި ގޮތެއްގައި، ހައްގުވެރީންނަށް އެހީތެރިކަން ފޯރުކޮށްދެވޭނެއެވެ.
