2.4 ބިލިއަން ރުފިޔާގެ ބޮންޑުން ޕެންޝަން ފަންޑަށް ގެއްލުމެއް ނުވާނެ ކަމަށް ޕެންޝަން އޮފީހުން ބުނެފިއެވެ.
ޕެންޝަން އޮފީހުން ނެރުނު ބަޔާނެއްއި ބުނެފައިވަނީ ފިނޭންސް މިނިސްޓްރީން ހުށަހަޅާފައިވަނީ ދިވެހި ރުފިޔާ އާއި އެމެރިކާ ޑޮލަރުން މަންފާ ލިބޭ ގޮތަށް ފަރުމާކޮށްފައިވާ 2.4 ބިލިއަން ރުފިޔާގެ ބޮންޑެއްގައި އިންވެސްޓް ކުރުމަށް ކަމަށެވެ. މި އިންވެސްޓްމަންޓަށް ފައިސާ ހޯދަން ހުށަހަޅާފައި ވަނީ ޕެންޝަން ސްކީމުން މިހާތަނަށް އިންވެސްޓް ކޮށްފައިވާ ބޮންޑުތަކުގެ ތެރެއިން 2.4 ބިލިއަން ރުފިޔާގެ ބޮންޑު ސެކަންޑަރީ މާކެޓުގައި ވިއްކައިގެން ލިބޭ ފައިސާއިން ކަމަށް ވެސް ޕެންޝަން އޮފީހުން ބުނެފައިވެއެވެ.
މި މުއާމަލާތް ކުރިއަށް ގެންދިއުމުގައި، ސެކަންޑަރީ މާކެޓުގައި ބޮންޑުތައް ވިއްކާލާނީ ފަންޑަށް ގެއްލުން ނުވާނެ ފަދަ ގޮތަކަށް ކަމަށް ޕެންޝަން އޮފިހުން ވަނީ ބުނެފައެވެ. އަދި މިގޮތަށް ނިއްމާފައި ވަނީ ޕެންޝަން ސްކީމުގެ ދުރުރާސްތާ އިންވެސްޓްމަންޓް ސްޓްރެޓެޖީ އެކުލަވައިލާ ކޮންސަލްޓެންޓުންގެ ފަންނީ ލަފަޔަށް ރިއާޔަތްކުރުމަށްފަހުގަ ކަމަށް އެ އޮފީހުން ބުނެފައިވެއެވެ.
މި ބޮންޑު އިންވެސްޓްމަންޓުގެ ސަބަބުން ބާޒާރުން ބޭރު ފައިސާ ގަންނަން ނުޖެހި، އިންވެސްޓްމަންޓުގެ ތެރެއިން ޕެންޝަން ފަންޑުގައި ބޭރު ފައިސާގެ ރިޒާވެއް ބިނާކުރެވޭނެއެވެ. އަދި މުޅި މުއާމަލާތަކީ ޕެންޝަން ގާނޫނާއި ގަވާއިދުތަކުގެ އިމުގެ ތެރެއިން ހިންގޭ ހަރުދަނާ އިންވެސްޓްމަންޓެއް ކަމަށް އެއޮފީހުން ޔަގީންކަން ދީފައިވެއެވެ.
މި މުއާމަލާތް ހިންގަން ޕެންޝަން އޮފީހުގެ ބޯޑުން ނިންމާފައިވަނީ މިދިޔަ އޮކްޓޫބަރު މަހުގައެވެ.
