އަންނަ އޭޕްރިލް 4 ގައި ބާއްވާ ލޯކަލް ކައުންސިލް އިންތިހާބުގެ ސެކުރިޓީ ކަށަވަރު ކުރުމަށް އިލެކްޝަން ކޮމިޝަން (އީސީ) އާދިވެހި ފުލުހުންގެ ހިދުމަތާ ދެމެދު އެއްބަސްވުމެއްގައި ސޮއިކޮށްފިއެވެ.
ލޯކަލް ކައުންސިލް އިންތިހާބާއި އަންހެނުންގެ ތަރައްގީއަށް މަސައްކަތްކުރާ ކޮމިޓީގެ އިންތިހާބުގެ ސެކުރިޓީ ވަރުގަދަ ކުރުމަށްޓައި ފުލުހުންނާއި އީސީގެ މެދުގައި ސޮއިކުރީ އިއްޔެ އެވެ.
އީސީގެ ފަރާތުން މި އެއްބަސްވުމުގައި ސޮއިކުރައްވާފައި ވަނީ އެ ކޮމިޝަނުގެ ރައީސް މުހައްމަދު ޒާހިދެވެ. ފުލުހުންގެ ފަރާތުން ސޮއިކުރެއްވީ ޕޮލިސް ކޮމިޝަނަރު އިސްމާއިލް ނަވީނެވެ. މި އެއްބަަސްވުމަކީ އިންތިހާބުގައި ބައިވެރިވާ މީހުންނާއި ވޯޓުލާ ސްޓޭޝަނާއި ވޯޓުލާ އޭރިއާގެ ރައްކާތެރިކަން ކަށަވަރު ކުރުމަށްޓަކައި ސޮއިކޮށްފައިވާ އެއްބަސްވުމެކެވެ.
އީސީން ބުނީ މި އެއްބަސްވުމުގެ ދަށުން އިންތިހާބުގެ ލޮޖިސްޓިކް މަސައްކަތްތަކާއި، ސަލާމަތީ ކަންކަން ބެލެހެއްޓުމާއި، އެ ކޮމިޝަނުގެ ފަރާތުން އެހީތެރިކަމަށް އެދިއްޖެ ކަމެއްގައި، އެކަމެއް ކުރުމުގައި ފުލުހުންގެ އެހީތެރިކަން ލިބިގެންދާނެ ކަމަށެވެ.
ރާއްޖޭގެ އަމަންއަމާންކަން ގާއިމުކޮށް، ރައްޔިތުންގެ އިތުބާރު ދަމަހައްޓައި، މިނިވަން އަދި އިންސާފުވެރިކަމާއެކު ދެފުށް ފެންނަ ގޮތަށް އިންތިހާބުތައް ކުރިއަށް ގެންދިއުމަށް ދޭންޖެހޭ ފުރިހަމަ އެއްބާރުލުން ފުލުހުން އަބަދުވެސް ދެމުންގެންދާނެ ކަމަށް އެ ހިދުމަތުން ވަނީ ބުނެފަ އެވެ.
