ރައީސުލްޖުމްހޫރިއްޔާގެ ސްޕެޝަލް އެންވޯއީގެ މަގާމުގައި ހުންނެވި ކުރީގެ ރައީސް ޑރ. މުހައްމަދު ވަހީދު ހަސަން އެމަގާމުން އިސްތިއުފާ ދެއްވައިފި އެވެ.
އެމަނިކުފާނު އެ މަގާމުން އިސްތިއުފާ ދެއްވާފައިވަނީ އިޔެއެވެ. އަދި އެމަނިކުފާނުގެ އިސްތިއުފާ ދެއްވާފައިވާ ކަމުގެ ސިޓީ މިއަދު ހެނދުނުގެ ވަގުތެއްގައި ރައީސުލްޖުމްހޫރިއްޔާއަށް ފިނުއްވާފައިވާ ކަމަށް ރައީސް އޮފީހުން ވަނީ އަންގާފައެވެ.
އެމަނިކުފާނު އެ މަގާމުން އިސްތިއުފާ ދެއްވާފައި ވަނީ ކުޑަކުދިންނަށް ޖިންސީ ގޯނާކުރިކަން ސާބިތުވެފައިވާ ޖެފްރީ އެޕްސްޓީންއާ އެކު އެމަނިކުފާނު ބަދަލު ކުރައްވަވާފައިވާ މެއިލްތަކެއް ސޯޝަލް މީޑިއާގައި ދައުރުވަމުން ދަނިކޮށެވެ. މިކަމާގުޅޭގޮތުން އެމަނިކުފާނު ވިދާޅުވެފައި ވަނީ އެ މެއިލްތައް ބަދަލު ކުރެއްވި އިރު، ޖެފްރީއަށް ކޮށްފައިވާ ތުހުމަތުތައް އެމަނިކުފާނަށް ސާފުވެވަޑައިގަނެފައި ނުވާމުގައެވެ.
އެއާއެކު، އެމަނިކުފާނު ވަނީ ޖެފްރީއާއެކު ދެ ފަހަރެއްގެ މަތީން ބައްދަލުކުރައްވާފައިވާ ކަމަށް ވިދާޅުވެފައެވެ. ނަމަވެސް މި ބައްދަލު ކުރެއްވުންތަކަކީ ރަސްމީ ހައިސިއްޔަތަކުން ބޭއްވި ބައްދަލުވުންތަކެއް ކަމަށް އެމަނިކުފާނު ވަނީ ވިދާޅުވެފައެވެ. އެގޮތުން ފުރަތަމަ ބައްދަލުވުމަކީ، ސެޕްޓެމްބަރު 23، 2012ގައި ރޭގަނޑުގެ ކެއުމެއްގައި ބޭއްވި ބައްދަލުވުމެއް ކަމަށާއި އެ ބައްދަލުވުމުގައި ސަރުކާރުގެ އިސްވެރިން ވެސް ބައިވެރިވިވެފައިވާ ކަމަށް އެމަނިކުފާނު ވިދާޅުވެފައިވެއެވެ. އަދި ދެވަނަ ފަހަރަށް ބައްދަލުކުރެއްވީ، އެ މަނިކުފާނުގެ ދަރިފުޅު ޖެފްރީ ސާލިމް ވަހީދާ އެކުގައި މެއި 18، 2014ގައި ކަމަށް ވިދާޅުވެފައިވެއެވެ. މިނޫން ގޮތަކަށް އެމަނިކުފާނު ޖެފްރިއާއެކު އެއްވެސް މުއާމަލާތެއް ކޮށްފައި ނުވާނެކަމަށް، އެމަނިކުފާނު ވަނީ ވިދާޅުވެފައެވެ.
ރައީސްގެ އެންވޯއިއަކަށް, ކުރީގެ ރައީސް ޑރ. މުހައްމަދު ވަހީދު ހަސަން އައްޔަން ކުރެއްވީ މިދިޔަ އަހަރުގެ މެއިމަހުގެ 26 ވަނަ ދުވަހުގައެވެ.
