ލޯކަލް ކައުންސިލްތަކުގެ އިންތިހާބާ އެކު ރިފަރެންޑަމް ބާއްވާނަމަ އިތުރު 20 މިލިއަން ރުފިޔާ ބޭނުންވާނެ ކަމަށް އެލެކްޝަން ކޮމިޝަން (އީސީ) އިން ބުނެފިއެވެ.
އީސީގެ ރައީސް މުހައްމަދު ޒާހިދު މިފަދައިން ވިދާޅުވީ ރިޔާސީ އިންތިހާބާއި ރަައްޔިތުންގެ މަޖިލީހުގެ އިންތިހާބު އެކުއެކީގައި ބޭއްވުމަށް ގާނޫނުއަސާސީ އަށް ހުށަހަޅާފައިވާ އިސްލާހުގެ ބިލު ދިރާސާ ކުރުމަށް މަޖިލީހުގެ މިނިވަން މުއައްސަސާތަކުގެ ކޮމިޓީން މިއަދު ބޭއްވި ބައްދަލުވުމުގަ އެވެ. މި ބައްދަލުވުމަށް އިލެކްޝަންސް ކޮމިޝަނުގެ އިތުރުން އެޓާނީ ޖެނެރަލް ވެސް ވަނީ ހާޒިރުކޮށްފަ އެވެ.
ޒާހިދު ވިދާޅުވިގޮތުގައި ލޯކަލް ކައުންސިލްތަކުގެ އިންތިހާބާ އެކު ރިފަރެންޑަމް ބާއްވަން ނިންމައިފި ނަމަ، އެކަމަށް އީސީ އޮތީ ތައްޔާރަށެވެ. އެކަމަކު، އެގޮތަށް ރެފަރެންޑަމް ބާއްވާނަމަ، އިތުރު 20 މިލިއަން ރުފިޔާ ބޭނުންވާނެ ކަމަށް އޭނާ ވިދާޅުވި އެވެ. މި ފައިސާ އަކީ އިންތިހާބު ބޭއްވުމަށް ކުރަން ޖެހޭ ހުރިހާ ހަރަދަކަށް ބޭނުންވާނެ ފައިސާކަމަށް އޭނާ ވިދާޅުވި އެވެ. އެގޮތުން މި ފައިސާ ބޭނުންކުރާނީ އޭނާ ވިދަޅުވި ގޮތުގައި، ވޯޓު ކަރުދާސް ޕުރިންޓް ކުރުމަށާއި އޮފިޝަލުންނަށް މުސާރަދިނުމަށެވެ.
ޒާހިދު ވިދާޅުވީ، ކައުންސިލް އިންތިހާބާ ވަކިން ރެފަރެންޑަމް ބާއްވާނަމަ 60 މިލިއަނާއި 80 މިލިއަނާ ދެމެދުގެ އަދަދަކަށް ފައިސާ ހަރަދުވާނެ ކަމަށެވެ.
“އެކަމަކު އެއްކޮށް ބާއްވާ ކަމަށް ވަންޏާ މިދަންނަވާ ހެން 20 މިލިއަން އިން އަޅުގަނޑުމެންނަށް ވާނެ،” އީސީގެ ރައީސް ވިދާޅުވެފައިވެއެވެ.
އޭނާ ވިދާޅުވީ، ލޯކަލް ކައުންސިލްތަކުގެ އިންތިހާބާ އެކު ރިފަރެންޑަމް ބާއްވާނަމަ މިމަހުގެ 18 ގެ ކުރިން ބިލުގެ މަސައްކަތް ނިންމަން ޖެހޭނެ ކަމަށެވެ. އަދި ރައްޔިތުން މި ބިލަށް ހޭލުންތެރި ކުރުވުމަށް ރިފަރެންޑަމްގެ ކުރިން 45 ދުވަހުގެ މުހުލަތެއް ދޭން ޖެހޭކަން އޭނާ ފާހަގަކުރެއްވި އެވެ.
