“ބިންވެރިޔާ” ސްކީމްގެ ދަށުން ގިރާވަރުފަޅުން ގޯތިލިބޭ ފަރާތްތަކުގެ އައު ލޮޓް ނަންބަރުތައް ކަނޑައެޅުމަށްޓަކައި ކުރިއަށް ގެންދިޔަ ގުރުއަތުލުން ނިމެއްޖެއެވެ.
މި ގުރުއަތުލުން ކުރިއަށް ގެންގޮސްފައި ވަނީ އިއްޔެ ހެނދުނު 9:30 އިން ފެށިގެންނެވެ. އަދި މިމަސައްކަތް ނިއްމާލާފައި ވަނީ ރޭ މެންދަމު 2 ޖެހި އިރުގައެވެ. ވޯޓުލުން ކުރިއަށް ގެންގޮސްފައި ވަނީ ސޯޝަލް ސެންޓަރުގަ އެވެ.
ގިރާވަރުފަޅުން ގޯތިލިބޭ ފަރާތްތަކުގެ އައު ލޮޓް ނަންބަރުތައް ކަނޑައެޅުމަށްޓަކައި މި ވޯޓުލާފައި ވަނީ ކުރީގެ ޝާއިއުކުރެވުނު ޕްލޭންގައި 610 ގޯތި މަދުވާތީ، އެ އަދަދު ހިމަނައިގެން ގިރާވަރުފަޅުން ދޫކުރަންޖެހޭ ޖުމްލަ 4,072 ގޯތި ހިމެނޭހެން ހައުސިން މިނިސްޓްރީން އައު ލޭންޑް ޔޫސް ޕްލޭންއެއް އެކުލަވާލުމުންނެވެ.
ގިރާވަރުފަޅުން ދޫކުރާ ގޯތީގެ އަދަދާއި ބޮޑުމިނުގެ ތަފްސީލު:
- 1250 އަކަފޫޓުގެ 2603 ގޯތި
- 1650 އަކަފޫޓުގެ 1214 ގޯތި
- 2050 އަކަފޫޓުގެ 254 ގޯތި
- 2450 އަކަފޫޓުގެ 01 ގޯތި
ގޯތި ހަވާލުކުރުމުގެ އެއްބަސްވުމުގެ ސޮއިކުރުމާއި ގޯތީގެ ރަޖިސްޓަރީ ހަވާލުކުރުމުގެ މަސައްކަތް ކުރިއަށް ދާނީ ގިރާވަރުފަޅު ބިން ހިއްކުމުގެ އަމަލީ މަސައްކަތް ނިމުމުން ކަމަށް ހައުސިން މިނިސްޓްރީން ވަނީ ބުނެފައެވެ. އަދި މިކަމުގެ މައުލޫމާތު ވަރަށް އަވަހައް ގެޒެޓްގައި ޝާއިރު ކުރާނެ ކަމަށް ވެސް ވަނީ ބުނެފައެވެ.
ގިރާވަރުފަޅުން ޖުމުލަ 167.15 ހެކްޓަރު ހިއްކުމަށް ހަމަޖެހިފައިވާއިރު, އެމްއޭސީއެލުން މިހާރު ހިއްކަން ފެށީ ގިރާވަރުފަޅުން ނުހިއްކާ އޮތް 97.15 ހެކްޓަރެވެ. ގިރާވަރުފަޅު ހިއްކުމުގެ މަސައްކަތްތަކީ މާލޭގައި ދިރިއުޅޭ ފަރާތްތަކަށް ދިމާވެފައިވާ ބޯހިޔާވަހިކަމުގެ މައްސަލައަށް ހައްލެއް ގެނައުމަށްޓަކައި ފަށާފައިވާ މަޝްރޫއެކެވެ.
