ކްރެޑިޓް ރޭޓިންގ “ސީއޭއޭ2” އިން “ސީއޭއޭ1” އަށް މަތިކޮށް، ރޭޓިންގގެ އައުޓްލުކް “ސްޓޭބަލް” އަށް ބަދަލުކޮށްފައިވާކަން ބައިނަލްއަގުވާމީ ކްރެޑިޓް ރޭޓިންގ އެޖެންސީ، މޫޑީސް އިން އިއުލާނުކޮށްފިއެވެ.
މޫޑީސް އިން މިދިޔަ އޮކްޓޫބަރު މަހު ނެރުނު ރިޕޯޓުގައި ބަޔާންކޮށްފައިވާ ގޮތުގައި، ރޭޓިންގއަށް މި ކުރިއެރުން ގެނެސްފައިވަނީ ކުރުމުއްދަތުގައި ރާއްޖެއަށް ކުރިމަތިވެދާނެ ޑިފޯލްޓް ހިރާސްތައް ބޮޑުތަނުން ކުޑަވެފައިވާކަމަށް ފާހަގަކުރެވޭތީއެވެ. މީގެ މައިގަނޑު ސަބަބުތަކުގެ ތެރޭގައި، 2026 ވަނަ އަހަރުގެ އެޕްރީލް މަހު ދައްކަންޖެހޭ 500 މިލިއަން ޑޮލަރުގެ ސުކޫކް ކާމިޔާބުކަމާއެކު އަނބުރާ ދެއްކުމާއި، ރިޒާވް ބޭންކް އޮފް އިންޑިއާއަށް ދައްކަންޖެހޭ 400 މިލިއަން ޑޮލަރުގެ ކަރަންސީ ސްވޮޕް ފެސިލިޓީ އަދާކުރުން ހިމެނެއެވެ.
މީގެ އިތުރުން، ސްޓޭޓް ބޭންކް އޮފް އިންޑިއާއިން އިންވެސްޓުކޮށްފައިވާ ޖުމްލަ 100 މިލިއަން ޑޮލަރުގެ ޓްރެޒަރީ ބިލްތައް ދައްކައި ހަލާސްކުރުމާއި، 2026 ވަނަ އަހަރު މެޗުއަރވާ 100 މިލިއަން ޑޮލަރުގެ ޔޫރޯބޮންޑު 2031 ވަނަ އަހަރާ ހަމައަށް ފަސްކުރެވިފައިވުން ވެސް ފާހަގަކޮށްފައިވެއެވެ. އަދި ބޭރު ފައިސާގެ ރިޒާވް ވަރުގަދަކުރުމަށް ސަރުކާރުން ކުރަމުންދާ މަސައްކަތްތަކާއި، ސޮވެރިން ޑިވެލޮޕްމަންޓް ފަންޑު (އެސްޑީއެފް) އަށް ޖަމާކުރާ ފައިސާ އިތުރުވުމާއި، ބައިނަލްއަގުވާމީ މާލީ އިދާރާތަކުގެ އެއްބާރުލުން ލިބެމުންދިއުން ވެސް ރޭޓިންގ މަތިވުމުގެ ސަބަބުތަކުގެ ތެރޭގައި ހިމެނެއެވެ.
މެދުރާސްތާގައި ދައްކަންހުރި ބޭރު ފައިސާގެ ދަރަނި ދަށްވުމާއި، ބައިނަލްއަގުވާމީ އިދާރާތަކުގެ އެހީތެރިކަން ލިބުމަކީ މާލީ ގޮންޖެހުންތަކުން އަރައިގަތުމަށް ލިބުނު ބާރެއްކަމަށް މޫޑީސްގެ ރިޕޯޓުގައި ފާހަގަކޮށްފައިވެއެވެ. އެގޮތުން ވޯލްޑް ބޭންކުން 40 މިލިއަން ޑޮލަރު، އޭޝިއަން ޑިވެލޮޕްމަންޓް ބޭންކުން 50 މިލިއަން ޑޮލަރު އަދި އޯޕެކް ފަންޑުން 40 މިލިއަން ޑޮލަރުގެ ފައިނޭންސިންގ ސަރުކާރުން ވަނީ ހޯދާފައެވެ. އަދި އައު ފައިނޭންސިންގ ހޯދުމުގައި ދަރަނި ދެމެހެއްޓެނިވި މިންގަނޑެއްގައި ހިފެހެއްޓުމަށް ސަރުކާރުން ހާއްސަ އަހަންމިއްޔަތުކަމެއް ދޭކަން ވެސް ވަނީ ފާހަގަކޮށްފައެވެ.
މި މަސައްކަތްތަކުގެ ނަތީޖާއެއްގެ ގޮތުން، 2025 ވަނަ އަހަރުގެ ނިޔަލަށް ޖީޑީޕީގެ ނިސްބަތުން 129.2 އިންސައްތައިގައި ހުރި ދައުލަތުގެ ދަރަނި، 2026 ވަނަ އަހަރުގެ ޖުލައި މަހުގެ ނިޔަލަށް ވަނީ 122.6 އިންސައްތައަށް ދަށްވެފައެވެ. މިއީ 2023 ވަނަ އަހަރުގެ ނިޔަލަށް ދަރަނި ހުރި މިންވަރަށްވުރެ ވެސް ދަށް އަދަދެކެވެ. މިއީ ސަރުކާރުގެ ހަރުދަނާ ސިޔާސަތުތަކުގެ ސަބަބުން ފިސްކަލް އަމާޒުތަކަށް ވާސިލްވަމުންދާކަމުގެ ހެއްކެކެވެ.
މެދުއިރުމަތީގެ މަސްރަހުގެ ސަބަބުން ހަކަތައިގެ އަގު އުފުލިދާނެ ކަމަށް ލަފާކުރެވުނު ނަމަވެސް، އިގުތިސާދީ ވިލުންތެރިކަން އިތުރުކޮށް ރިޒާވް ވަރުގަދަކުރުމުގެ ސިޔާސަތުތައް ފުރިހަމައަށް ތަންފީޒުކުރަމުންދާނެ ކަމުގެ ޔަގީންކަން ސަރުކާރުން ދެއެވެ. އަދި ރައްޔިތުންގެ އަސާސީ ކަންކަމަށް ދަތިނުވާނޭހެން އިގުތިސާދީ ހަރަކާތްތައް ކުރިއަށް ގެންދާނެ ކަމަށް ވެސް ބަޔާންކޮށްފައިވެއެވެ.
ސަރުކާރުގެ މެދުރާސްތާގެ މައިގަނޑު އަމާޒަކީ މެކްރޯ އިކޮނޮމިކް ހަމަޖެހުން ގާއިމުކޮށް، ދައުލަތުގެ މާލިއްޔިއްޔަތު ދެމެހެއްޓެނިވި ގޮތެއްގައި ކުރިއަށް ގެންދިއުމެވެ. މީގެއިތުރުން އިއާދަކުރަނިވި ހަކަތައަށް ބަދަލުވުމުގެ މަސައްކަތް އަވަސްކުރުމާއި، ވިޔަފާރީގެ އުމްރާނީ ވަސީލަތްތައް ތަރައްގީކުރުން ވެސް މި އަމާޒުތަކުގެ ތެރޭގައި ހިމެނެއެވެ.
