ރާއްޖޭގެ ފަތުރުވެރިކަމުގެ ސިނާއަތަށް ލިބެމުންދާ ބޮޑު ކުރިއެރުމާއެކު، މިއަހަރުގެ މިހާތަނަށް ރާއްޖެއަށް 1.4 މިލިއަނަށްވުރެ ގިނަ ފަތުރުވެރިން ޒިޔާރަތްކޮށްފިއެވެ.
ޓޫރިޒަމް މިނިސްޓްރީން އެންމެ ފަހުން އާންމުކުރި ތަފާސްހިސާބުތައް ދައްކާގޮތުން ޖުމްލަ 1,461,682 ފަތުރުވެރިން ރާއްޖެއަށް އައިސްފައިވެ އެވެ. މީގެތެރެއިން ބޮޑު އިންސައްތައެއް ހިޔާރުކޮށްފައިވަނީ ރިސޯޓުތަކެވެ. އެގޮތުން 73.5 އިންސައްތަ ނުވަތަ 1,053,055 ފަތުރުވެރިން ޗުއްޓީ ހޭދަކޮށްފައިވަނީ ރާއްޖޭގެ ރިސޯޓުތަކުގައެވެ.
މީގެއިތުރުން، ރާއްޖޭގެ ލޯކަލް ޓޫރިޒަމް ސިނާއަތަށް ބަލާއިރު، 317,178 ފަތުރުވެރިން ގެސްޓްހައުސްތަކުގައި ޗުއްޓީ ހޭދަކޮށްފައިވެ އެވެ. ހޮޓާތަކުގައި ތިބީ 33,513 ފަތުރުވެރިންނެވެ. ހަމައެއާއެކު، ކްރޫޒް ލައިނަރުތަކުގައި ރާއްޖެއަށް ޒިޔާރަތްކުރި ފަތުރުވެރިންގެ އަދަދު ވަނީ 26,550 އަށް އަރާފައެވެ.
ރާއްޖެއަށް އެންމެ ގިނައިން ފަތުރުވެރިން އަންނަ ގައުމުތަކުގެ ލިސްޓުގެ ކުރީގައި އަދިވެސް އޮތީ ޗައިނާއެވެ. އެގޮތުން އެ ގައުމުން 268,117 ފަތުރުވެރިން ޒިޔާރަތްކޮށްފައިވެއެވެ. މި ލިސްޓުގެ ދެވަނައިގައި 209,815 ފަތުރުވެރިންނާއެކު ރަޝިޔާ އޮތްއިރު، ތިންވަނައިގައި އޮތީ 110,983 ފަތުރުވެރިން ޒިޔާރަތްކުރި ޔުނައިޓެޑް ކިންގްޑަމް އެވެ. މީގެއިތުރުން، އެންމެ ކުރީގައި އުޅޭ 6 ގައުމުގެ ތެރޭގައި ދެން ހިމެނެނީ އިޓަލީ އާއި ޖަރުމަނުވިލާތުގެ އިތުރުން އަވަށްޓެރި އިންޑިއާއެވެ.
ދިވެހި އިގްތިސާދު މައިނާރު ކަމަށްވާ ފަތުރުވެރިކަމުގެ ސިނާއަތް ބޭރުގެ ނޭދެވޭ ނުފޫޒުތަކުން ރައްކާތެރިކޮށް، ދުނިޔޭގެ އެކި ސަރަހައްދުތަކުގައި ރާއްޖޭގެ މަގުބޫލުކަން އިތުރުކުރުމަށްޓަކައި ޓޫރިޒަމް މިނިސްޓްރީއާއި ސަރުކާރުގެ ކަމާބެހޭ އިދާރާތަކުން ގެންދަނީ ވަރުގަދަ މާކެޓިންގް މަސައްކަތްތަކެއް ސާބިތުކަމާއެކު ކުރަމުންނެވެ.
