ދުންފުހުގެ ސަބަބުން މި ދެ ދުވަހު ވައި ނުސާފުވާނެތީ އެކަމަށް ސަމާލުވުމަށް ހެލްތް ޕްރޮޓެކްޝަން އެޖެންސީ (އެޗްޕީއޭ) އިން އިލްތިމާސްކޮށްފި އެވެ.
މޫސުމާބެހޭ ގައުމީ އިދާރާ (މެޓް) ގެ ތަފާސް ހިސާބުތަކުން ދައްކާގޮތުގައި ރާއްޖޭގެ ސަރައްހަދުތަކަށް، ހާއްސަކޮށް މެދު ރާއްޖެތެރޭގެ އަތޮޅުތަކަށް ދުންފުހުގެ އަސަރު ވަރަށް ބޮޑަށް ކުރަމުން ނެވެ. އެގޮތުން، މިއަދާއި މާދަމާ، ދުންފުހުގެ އަސަރު ރާއްޖޭގެ ސަރަހައްދުގައި ހުންނާނެ ކަމަށް ބެލެވޭކަމަށް މެޓުން ވަނީ ބުނެފައެވެ.
މިކަމާ ގުޅިގެން ރައްކާތެރިކަމުގެ ފިޔަވަޅުތައް އަޅަން ހާއްސަ ސަމާލުކަމެއް ދިނުމަށް އެޗްޕީއޭއިން ވަނީ އިލްތިމާސްކޮށްފަ އެވެ. އަދި ވައި ސާފު މިންވަރު ބެލުމަށް މިނިސްޓްރީ އޮފް ޓޫރިޒަމް އެންޑް އެންވަޔަރަމެންޓްގެ ލިންކް އިން iqair.com/maldives ނުވަތަ IQAir Visual އެޕް އަޅައިގެން ބަލާލެވޭނެ ކަމަށް އެއިދާރާއިން ވަނީ ބުނެފައެވެ.
އެންމެ ވައި ނުސާފު ސަރަހައްދުތައް:
- ހދ ކުޅުދުއްފުށި- 158 ޔޫއެސް އޭކިއުއައި
- ކ ވިލިގިލި- 158 ޔޫއެސް އޭކިއުއައި
- ދ ކުޑަހުވަދޫ- 156 ޔޫއެސް އޭކިއުއައި
- ފުވައްމުލައް- 157 ޔޫއެސް އޭކިއުއައި
ދުން ފުހުން ރައްކާތެރިވުމަށް އެޅިދާނެ ފިޔަވަޅުތައް:
- ނޭވާލާ ނިޒާމުގައި މައްސަލަ ހުންނަ މީހުން ބޭރުގައި ކުޅިވަރުތައް ނުކުޅުން
- ބޭރަށް ނިކުންނައިރު މާސްކުއެޅުން
- ގޭގެ ދޮރުތައް ލައްޕާފަ ބެހެއްޓުން
- އެއާ ޕިއުރިފައިއާ ބޭނުންކުރުން.
އުތުރު އިންޑިއާގެ ހިމާލިޔަން ސަރަހައްދުގައި ވައި ތަގައްޔަރުވުމުގެ އަސަރު ރާއްޖެ އަށް މިދިޔަ އަހަރު ވެސް ކޮށްފައި ވާއިރު މި އަހަރު ވެސް އުތުރު އިންޑިއާގައި މި ދުވަސްވަރު ވަނީ ވަރަށް ބޮޑަށް ވައި ނުސާފުވެ ދަތުރުފަތުރަށް ވެސް ހުރަސްއެޅިފަ އެވެ.
