ރައީސުލްޖުމްހޫރިއްޔާ ޑރ މުހައްމަދު މުއިއްޒު ޖަރުމަނުގެ ޔުނިވާސިޓީއެއްގައި ތަގުރީރު ކުރައްވާ ގޮތަށް ހަމަޖެހިއްޖެ އެވެ.
ރާއްޖެއަކީ ޖަޒީރާ ގައުމަކަށް ވުމުގެ ސަބަބުން މޫސުމަށް އަންނަ ބަދަލުތަކުގެ އަސަރު، ރާއްޖެއަށް ވަރަށް ބޮޑަށް ކުރެއެވެ. މިކަމާ ގުޅޭ ގޮތުން ރައީސް ޖަރްމަނުގެ ޔުނިވާސިޓީއެއްކަމަށްވާ ހަމްބޯލްޓް ޔުނިވާސިޓީގައި އަންނަ މަހު 11ގައި ތަގުރީރެއް ދެއްވުމަށް ވަނީ ހަމަޖެހިފައެވެ.
ރައީސްގެ ތަގުރީރުގެ މަައުލޫއަކީ ކްލައިމެޓް ޗޭންޖް ވިތައުޓް ބޯޑާސް: ލެސަންސް ފްރޮމް ދަ މޯލްޑިވްސް އެޑެޕްޓޭޝަން އެކްސްޕީރިއަންސް” އެވެ.
ރައީސްގެ ވާހަކަފުޅުގައި ކަނޑުގެ ލޮނުގަނޑު މައްޗަށް އެރުމާއި މޫސުމަށް އަންނަ ބަދަލުގެ ސަބަބުން ކުރިމަތިވާ އެހެނިހެން މައްސަލަތަކައް ހައްލުގެނައުމަށް ރާއްޖެއިން ކުރަމުންދާ މަސައްކަތްތަކަށް އަލިއަޅުއްވާލައްވާނެއެވެ. އެގޮތުން، މޫސުމަށް އަންނަ ބަދަލުތަކަށް އަހުލުވެރިވުމަށްޓަކައި ނުވަތަ ރައްކާތެރިވުމަށްޓަކައި ދިވެހިރާއްޖެއިން ކުރަމުން އަންނަ މަސައްކަތާއި ބައިނަލްއަގުވާމީ މުޖުތަމައުއަށް ގުޅުންހުރި ގިނަ މައުލޫމާތުތަކެއް އެމަނިކުފާނުގެ ތަގުރީރުގައި ހިއްސާކުރައްވާނެއެވެ.
ރައީސްގެ ތަގުރީރަށް ފަހު، ހަމްބޯލްޓް ޔުނިވާސިޓީގެ ޕުރޮފެސަރުން ކަމަށްވާ މާޗެކް ރޮބޮސްޗޮން އަދި ޑރ އެކްސެލް ކްލައިއާއެކު މޫސުމީ ސިޔާސަތާއި، ބައިނަލްއަގުވާމީ ބައިވެރިވުމާއި، ބައިނަލްއަގުވާމީ މުޖުތަމައުއާއި އެކަޑަމީތަކަށް ކުރާ އުންމީދުގެ އިތުރުން، މޫސުމަށް އަންނަ ބަދަލުތައް ހައްލުކުރުމަށް ކުރާ މަސައްކަތުގައި ޔުނިވާސިޓީތަކާއި ރީސާޗް އިންސްޓިޓިއުޓްތަކުން އަދާކުރާ ދައުރާ ބެހޭގޮތުން މަޝްވަރާތަކެއް ކުރައްވާނެއެވެ. މިއާއެކު، މި މަޝްވަރާގައި ސައިންޓިފިކް ރީސާޗާއި، ބައުނަލްއަގުވާމީ ޕާޓްނަރޝިޕްތަކުން ސިޔާސަތު ނިންމުންތަކަށް މައުލޫމާތު ދިނުމާއި، ލޯކަލް އަދި ސަގާފީ އިކޯލޮޖިކަލް ނޮލެޖުން، ބައިނަލްއަގުވާމީ މޫސުމަށް އަންނަ ބަދަލުތައް ދިރާސާކުރުމަށް ލިބިގެންދާނެ އެހީއަށް ވެސް އަލިއަޅުއްވާލާނެއެވެ.
