ރާއްޖޭގެ އިސްލާމް މުގައްރަރު މިޒަމާނުގެ ޖީލަށް ވިސްނޭހެން ފަސޭހަ އިބާރާތުން އަލުން ލިޔަން ޖެހޭކަމަށް އިސްލާމިކް މިނިސްޓަރ ޑރ މުހައްމަދު ޝަހީމް އަލީ ސައީދް ވިދާޅުވެއްޖެ އެވެ.
މިނިސްޓަރު މިފަދައިން ވިދާޅުވެފައި ވަނީ އޭނާގެ ފޭސްބުކްގައި ކުރައްވާފައިވާ ޕޯސްޓެއްގައެވެ. މި ޕޯސްޓުގައި ޒަމާނަށް ފެތޭގޮތަށް އިސްލާމް ފޮތުގެ ވައްޓަފާޅިއާއި ލޭއައުޓް ވެސް ބަދަލު ކުރަން ފެންނަ ކަމަށް މިނިސްޓަރު ވަނީ ވިދާޅުވެފައެވެ. އަދި އިސްލާމް މުގައްރަރުގެ ކޮންމެހެން މުހިންމު ބައިތައް ހިމަނާފަ ގުރޭޑާއި އުމުރާ ގުޅޭ ގޮތަށް އަލުން ތަރައްގީ ކުރަން ފެންނަ ކަމަށް ވެސް މިނިސްޓާ ވިދާޅުވި އެވެ.
އެއާއެކު މިނިސްޓަރު ވަނީ އިސްލާމް މާއްދާގެ އެއްފޮތެއްގެ ގޮތުގައި އިސްލާމީ އެކި ދާއިރާތަކުގެ ބައިވަރު މައުލޫމާތު ހުރި ހުރުން އެކި މަރުހަލާތަކަށް ބަދަލުކޮށް ވަކި މާއްދާތާކުގެ ގޮތުގައި ބަހަަލަން ފެންނަ ކަމަށް ވެސް ވިދާޅުވެފައެވެ. އަދި ދަރިވަރުންނަށް އިސްލާން ކިޔަވަން ފަސޭހަ ވާނީ އިނގިރޭސިބަހުން ނަމަ އިސްލާމް މާއްދާ އިނގިރޭސި ބަހަށް ބަދަލު ކުރުމަކީ އެއް ވެސް މައްސަލައެއް ކަމަށް މިނިސްޓަރަށް ނުފެންނަކަމަށް ވެސް ވިދާޅުވެފައިވެ އެވެ.
ނަމަވެސް އިސްލާމް މާއްދާ ދިވެހި ބަހުން ކިޔަވާ ދިނުމުން، ބަސް ކުރިއަރާނެ ކަމަށް ދެކޭ ކަމަށާއި، ދިވެހި ބަސް އެންމެން ބޭނުންވާ ވަރަށް ކުރިއަރުވަން ބޭނުންވާ ނަމަ ތައުލީމީ ނިޒާމް އެއްކޮން ދިވެހި ބަހަށް ބަދަލުކުރަން ޖެހޭނެ ކަމަށް މިިނިސްޓަރު ވިދާޅުވެފައިވެއެވެ. ނަމަވެސް އެއީ ރާއްޖެއަށް އެންމެ މުނާސަބު ގޮތް ކަމުގައި ނުވެދާނެ ކަމަށް ވެސް އޭނާ ވިދާޅުވެފައިވެ އެވެ.
