ސިވިލް ސާވިސް އަންހެން މުވައްޒަފުންގެ އިސްތަށިގަނޑުގައި ކުލަ ޖެއްސުން މަނާކަމަށް ސާވިސް ކޮމިޝަނުން އިސްލާހުކުރި ގަވާއިދުގައި ބުނެފިއެވެ.
ސާވިސް ކޮމިޝަނުން އިސްލާހުކޮށްފައިވާ ގަވާއިދުގައި، އޮފީހުގެ މާހައުލަށް އެކަށީގެންވާ ގޮތުގެ މަތިން އިސްތަށިގަނޑު ރީތިކޮން ބެހެއްޓުމަށް ވަނީ ލިޔެފައެވެ. އަދި އިސްތަށިގަނޑު ކަޅުކުރުން ފިޔަވައ،ި ފާޅުކަން ބޮޑު ކުލަޖެއްސުމަކީ ނުވަތަ ކުލައިން ޝޭޑްކޮށް ހައިލައިޓްކުރުމަކީ ހުއްދަކަމެއް ނޫންކަމަށް މި ގަވާއިދުގައި ބުނެފައިވެއެވެ.
މި ގަވާއިދުގައި އަންހެން މުވައްޒަފުންނަށް ދިގުހެދުމާއި ދިވެހި ލިބާސް ބޭނުން ކުރެވޭނެ ގޮތަށް ވަނީ އިސްލާހުގެނެވިފަ އެވެ. އަދި އަންހެން މުއައްޒަފުންނަށް ކަކުލާ ހަމައަށް ވުރެ ކުރު ހެދުން ލުން މަނާކަމަށް ވެސް ބުނެފައިވެއެވެ.
ސިވިލްސާވީސް މުއައްޒަފުންގެ ހެދުން އެޅުމުގެ މިންގަނޑުތަކަށް އިސްލާހު ގެނެސްފައި ވަނީ، މިހާރު އަންހެން މުއައްޒަފުން ހެދުން އަޅަމުން އަންނަ ގޮތުގެ ސަބަބުން ގިނަ ބަޔަކު ޝަކުވާ ކުރާތީ އެވެ. އޭގެއިތުރުން، ހެދުމުގެ ކަރުވަޅާއި އަތް ރަސްމީ މިންގަނޑުތަކަށް ފެތޭ ގޮތަށް ބެހެންޓުމާއި، ހެދުމުގެ މަތީބައ،ި ގަމީސް އަދި ސޫޓު ޖެކެޓުގެ މަތީބައިގެ އަރިމަތިން ކުރިމަތިންނާއި ފުރަގަހުން އަދި ތިރިން ފަޅައިފައި ހުންނަ ނަމަ، ފަޅައިފައި ހުންނަބައި ހުންނަންވާނ،ީ މައްޗަށް އަތް ދަމާލީމާ އުނަގަނޑުން ތިރީބަޔާއި އުނަގަނޑުން މަތީބަޔާ ދެމެދުން ހަށިގަނޑުގެ އެއްވެސް ތަނެއް ނުފެންނަ ވަރަށް ބެހެއްޓުމަށް މިގަވާއިދުގައި ވެއެވެ.
މި ގަވާއިދުގައި ފިރިހެނުން ހެދުން އަޅަންވީ ގޮތް ވެސް ވަނީ ކިޔާދީފައެވެ. އެގޮތުން، ފިރިހެން މުއައްޒަފުން އޮފީހަށް އާދެވޭނީ، ރަސްމީ ފަޓުލޫނާއި، އަތްދިގު ނުވަތަ އަތްކުރު ގަމީހުގައެވެ. ގަމީސް ހުންނަންވާނީ ބެގީކޮށް ޓައީ އަޅާފަކަމަށާއި، އަރަންވާނީ އޮފީސް ބޫޓަށް ކަމަށް މިގަާއިދުގައި ބުނެފައިވެއެވެ. އަދި ގަހަނާގެ ގޮތުގައި އަނގޮޓި ފިޔަވައި އެހެން އެއްޗެއް ބޭނުންކުރުމާއި ފާޅުކަން ބޮޑު މޭކަޕް ކުރުމަކީ މަނާކަމެކެވެ. ނަމަވެސް އަންހެން މުއައްޒަފުންނަށް އެކަށިގެންވާ ގޮތުގެ މަތިން މޭކަޕްކޮށް، ގަހަނާ އެޅުމަކީ ހުއްދަ ކަމެކެވެ.
