ފާހިޝް އަމަލުތަކެއް ހިންގަމުން ދިޔަ 96 މަސާޖް ޕާލާ ބަންދުކޮށްފައިވާ ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެ އެވެ.
މިއަދު ރައީސް ކުރެއްވި ޓުއީޓެއްގައި ވަނީ ހުއްދަ ނަގާފައިވާ ވިޔަފާރީގެ ބަދަލުގައި ފާހިޝް އަމަލުތައް އެ ވިޔަފާރީގެ ނަން ބޭނުން ކޮށްގެން ހިންގަމުންދާ މަސާޖު ޕާލާތައް ބަންދު ކުރުމަށް، 9 ޑިސެންބަރު 2025 ގައި ފެށި އޮޕަރޭޝަން ގެ ދަށުން މިއަދާ ހަމަޔަށް 96 މަސާޖު ޕާލާ ބަންދުކޮށްފައިވާކަމަށް ވިދާޅުވެފައެވެ.
އެމަނިކުފާނު ވިދާޅުވީ، މުޖުތަމައުން ފާހިޝް ކަންތައްތަކާއި މުންކަރާތްތައް މަދުކޮށް، މުޖުމަތައުގެ ހާލަތު ބަދަލު ކުރެވޭނީ، އާއްމު ރައްޔިތުންނާއި އެންމެހާ ފަރާތްތަކެއްގެ ނިޔަތާއި އަމަލު ރަނގަޅުވެގެން ކަމަށް ރައީސް ވަނީ ފާހަގަކުރަށްވާފައެވެ. އަދި މިފަދަ ތަންތަން ހިނގަމުންދަނީ، މިފަދަ ތަންތަނުގެ ބޭނުން ހިފާ ފަރާތްތައް ތިބުމުން ކަމަށާއި، މިކަމަކީ ހިތާމަޔާ އެކީ ގަބޫލުކުރަންޖެހޭ ހަގީގަތެއް ކަމަށް ރައީސް ވަނީ ވިދާޅުވެފައެވެ.
އެހެންކަމުން، ދިވެހިންނަކީ ފާހިޝް ކަންކަމާއި އެންމެހާ މުންކަރާތް ތަކަށް ނޫނެކޭ ބުނާ ބަޔަކަށް ވުމަށް މަސައްކަތްކުރުމަށް އެމަނިކުފާނު ވަނީ އެދިލައްވާފައެވެ.
