އައްޑޫ ސިޓީގެ ހުޅުދޫ އާއި މީދޫ ރައްޔިތުން ބޭނުންވަނީ، ސިޓީ ކައުންސިލުން ވަކިވެ، އެ ދެރަށް ވަކި ދެ ކައުންސިލެއްކަމަށާއި، ފޭދޫން ބޭނުން ވަނީ މިހާރު އޮތް ގޮތަށް ސިޓީ ކައުންސިލާއެކު އޮތުމަށްކަމަށް މިއަދު ނެގި ހިޔާލު ހޯދުމުގެ ވޯޓުގެ ވަގުތީ ނަތީޖާއިން ދައްކައިފި އެވެ.
އާންމު ވޯޓުގައި ރައްޔިތުންގެ ހިޔާލު ހޯދާފައިވަނީ، އައްޑޫ ފޭދޫ، އައްޑޫ ހުޅުދޫ އަދި އައްޑޫ މީދޫގެ ނަމުގައި ކައުންސިލްތައް އުފައްދަން ފެނޭތޯ ބެލުމަށާއި، އައްޑޫ ހުޅުދޫ އާއި އައްޑޫ މީދޫ، އެއް ރަށު ކައުންސިލެއްގެ ދަށުން ހިންގުމަށްޓަކައި، އައްޑޫ ހުޅުމީދޫ ކައުންސިލް އުފައްދަން ފެނޭތޯ ބެލުމަށެވެ.
މި ވޯޓުގައި ޖުމްލަ 18 ވޯޓު ފޮއްޓެއް ބަހައްޓާފައި ވެއެވެ. އެއީ، ފޭދޫގައި 5 ވޯޓު ފޮށި، ހުޅުދޫގައި 3 ފޮށި، މީދޫގައި 3 ފޮށި އަދި މާލޭގައި 7 ފޮއްޓެވެ. ވޯޓްލުން ކުރިޔަށްދިޔައީ މިއަދު ހެނދުނު 8:00 އިން ހަވީރު 4:00 ގެ ނިޔަލަށެވެ. މިވޯޓުގައި ވޯޓުލުމުގެ ހައްގު 9،576 މީހަކަށް ލިބިފައިވާއިރު ވޯޓު ފޮށިތައް ބަންދުކުރިއިރު ވޯޓުލާފައިވަނީ 4،510 މީހުންނެވެ.
މި ވޯޓުގެ ވަގުތީ ނަތީޖާތައް ދައްކާގޮތުން، ހުޅުދޫގެ ގިނަ ރައްޔިތުން ވޯޓު ދީފައިވަނީ ވަކި ކައުންސިލެއް އުފައްދަން ފެންނަ ކަމަށެވެ. އަދި މީދޫގެ ރައްޔިތުންވެސް ބޭނުންވަނީ ވަކި ކައުންސިލެއް އުފައްދާށެވެ. ނަމަވެސް ފޭދޫގެ ރައްޔިތުން ބޭނުން ވަނީ އެރަށުގައި ވަކި ކައުންސިލެއް އުފައްދަން ނުފެންނަކަމަށެވެ.
މި ވޯޓުގެ ދާއިމީ ނަތީޖާ އިއުލާން ކުރާނީ މާދަމާ އެވެ. އެއާއެކު ރައްޔިތުންގެ ނިންމުމާއި އެއްގޮތަށް ކައުންސިލްތައް ބަދަލުކުރުމުގެ މަސައްކަތް ފެށިގެންދާނެ އެވެ.
މިއަދު ނެގި ވޯޓަކީ ރައްޔިތުންގެ ހިޔާލު ހޯދުމަށް ވަކި ގާނޫނެއް ހަދައިގެން، އެ ގާނޫނުގެ ދަށުން ނެގި ހިޔާލު ހޯދުމުގެ ފުރަތަމަ ވޯޓެވެ.
