އިމިގްރޭޝަންގެ އަތޮޅުތަކުގެ އޮފީސްތަކުން މިދިޔަ މަހު 960 ޕާސްޕޯޓު ދޫކޮށްފައިވާކަން މޯލްޑިވްސް އިމިގްރޭޝަނުން ހާމަކޮށްފި އެވެ.
އިމިގްރޭޝަނުން އާންމުކުރި ތަފާސްހިސާބުތައް ދައްކާ ގޮތުން މިދިޔަ ސެޕްޓެމްބަރު މަހު ޖުމްލަ 3884 ޕާސްޕޯޓް ދޫކޮށްފައިވެ އެވެ. އަދި 3897 އެޕްލިކޭޝަނެއް ވަނީ ޕްރޮސެސްކޮށްފައެވެ.
އެގޮތުން މާލެއިން 2115 ޕާސްޕޯޓް ދޫކޮށްފަވާއިރު ހުޅުމާލެ ފުރަތަމަ ފިޔަވަހިން 386 ފާސްޕޯޓު ދޫކޮށްފައިވާ ކަމަށާއި ހުޅުމާލެ ދެވަނަ ފިޔަވަހިން 367 ޕާސްޕޯޓް، ވިލިމާލެއިން 36 ޕާސްޕޯޓް މި މުއްދަތުގެ ތެރޭގައި ވަނީ ދޫކޮށްފައިވާ ކަމަށް އިމިގްރޭޝަނުން ބުނެފައިވެ އެވެ. މީގެއިތުރުން އިމިގްރޭޝަންގެ ރީޖަނަލް އޮފީސްތަކުން މިދިޔަ މަހު ޖުމްލަ 960 ޕާސްޕޯޓް ދޫކޮށްފައިވެއެވެ.
ރީޖަނަލް އޮފީސްތަކުން ޕާސްޕޯޓް ދޫކުރި ރަށްތަކާއި
• ސ. މަރަދޫ 146 ޕާސްޕޯޓް
• ހދ. ކުޅުދުއްފުށި ސިޓީ 144 ޕާސްޕޯޓް
• ލ. ފޮނަދޫ 122 ޕާސްޕޯޓް
• ގދ. ތިނަދޫ ސިޓީ 111 ޕާސްޕޯޓް
• ރ. އުނގޫފާރު 100 ޕާސްޕޯޓް
• ހއ. ދިއްދޫ 70 ޕާސްޕޯޓް
• ޏ. ފުވައްމުލަކު ސިޓީ 65 ޕާސްޕޯޓް
• ށ. ފުނަދޫ 57 ޕާސްޕޯޓް
• ދ. ކުޑަހުވަދޫ 47 ޕާސްޕޯޓް
• ބ. އޭދަފުށި 39 ޕާސްޕޯޓް
• ނ. މަނަދޫ 34 ޕާސްޕޯޓް
• ހއ. އިހަވަންދޫ 11 ޕާސްޕޯޓް
• އއ. ރަސްދޫ 9 ޕާސްޕޯޓް
• ވ. ފެލިދޫ 1 ޕާސްޕޯޓް
• ފ. ނިލަންދޫ 1 ޕާސްޕޯޓް
• މ. މުލި 1 ޕާސްޕޯޓް
• ތ. ވިލުފުށި 1 ޕާސްޕޯޓް
• ތ. ވޭމަންޑޫ 1 ޕާސްޕޯޓް
އިމިގްރޭޝަނުން ބުނީ މެލޭޝިޔާގައި ހުންނަ އިމިގްރޭޝަން އޮފީހުން 20 ޕާސްޕޯޓް ދޫކޮށްފައިވާއިރު، މިދިޔަ މަހު 25 ޕާސްޕޯޓެއް ގެއްލިގެން ރިޕޯޓްކޮށްފައިވާކަމަށެވެ.
ދިވެހި ރައްޔިތެއްކަން އަންގައިދޭ ކާޑާއި ޕާސްޕޯޓުގެ ޚިދުމަތް ރައްޔިތުންނާ ގާތުން އަވަހަށް ފޯރުކޮށްދިނުމުގެ ގޮތުން އެ ޚިދުމަތްތައް މުޅި ރާއްޖެއަށް ފުޅާކުރެއްވުމަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ މުހިންމު ސިޔާސަތެކެވެ. އެމަނިކުފާނުގެ މިސިޔާސަތުގެ ދަށުން މި ޚިދުމަތް މުޅި ރާއްޖެއަށް ފުޅާކުރެއްވުމުގެ މަސައްކަތް މިދިޔަ ނޮވެންބަރު މަހުގެ 16ވަނަ ދުވަހު ވަނީ އިފްތިތާޙްކުރައްވާފައެވެ.
ރައީސްގެ ވަޢުދާއެއްގޮތަށް މުޅި ރާއްޖެއަށް ޕާސްޕޯޓުގެ ޚިދުމަތް ފުޅާކުރުމުގެ މަސައްކަތުގެ މިހާރުވަނީ ފުއްދަވާފައެވެ.
