ވިޔަފާރިވެރިންނާއި ރިސޯޓުތައް ހިންގާ މީހުން ގަޔާނުވިޔަސް ޓޫރިޒަމް ޓެކްސް ނުވަތަ ޓީޖީއެސްޓީ ބޮޑުކުރުމަކީ މިވަގުތަށް ކޮންމެހެން ކުރަން ޖެހިފައިވާ ކަމެއް ކަމަށް ޕީއެންސީގެ ޕާލަމެންޓްރީ ގުރޫޕުގެ ލީޑަރު އަދި އިނގުރައިދޫ ދާއިރާގެ މެމްބަރު އިބްރާހިމް ފަލާހު މިއަދު ވިދާޅުވެއްޖެ އެވެ.
ޓޫރިޒަމް ދާއިރާ އިން ނަގާ ޓެކްސް 16 ޕަސެންޓުން 17 ޕަސެންޓަށް ބޮޑުކުރުމަށް ސަރުކާރުން ހުށަހަޅާފައިވާ ބިލަށް ބަހުސް ކުރައްވަމުން ފަލާހު އެހެން ވިދާޅުވީ، އަހަރުން އަހަރަށް ޓެކްސް ބޮޑުކުރަމުން ގެންދާ ނަމަ ގައުމު އިނދަ ޖެހިދާނެ ކަމަށް ސަން ޓެރެވެލްސްގެ ވެރިޔާ މީދޫ ދާއިރާގެ މެމްބަރު އަހުމަދު ސިޔާމް މުހައްމަދު ވިދާޅުވުމާ ގުޅިގެންނެވެ.
ފަލާހު ވިދާޅުވީ ވިޔަފާރިވެރިންނަށް މި ނިންމުން ހިތްގައިމު ނުވިނަމަވެސް، ވިޔަފާޜިވެރިންނަށް ސަރުކާރުން މިހާރު ވެސް ފޯރުކޮށްދެމުންދާ އިނާޔަތްތަކަށް ބަލައި އަދިވެސް އެ އަދަދު ކުޑަ ކަމަށެވެ.
ޓޫރިޒަމާ ގުޅުން ހުރި ވިޔަފާރިތަކުން އިންވެސްޓް ކުރުމަށްޓަކައި ދައުލަތުން ސޮވަރިން ގެރެންޓީ ދީގެން ލޯނު ހޯދާފައި ހުންނާނީ ވަރަށް ކުޑަ އިންޓްރެސްޓެއްގައި ކަމަށް ފަލާހު ވިދާޅުވި އެވެ.
“ދައުލަތުން ހުރިހާ ރައްޔިތުންގެ މޯގޭޖު ކޮށްފައި ރިސޯޓު އޯނަރުންނަށް ދޭ ގެރެންޓީ އާއި އިނާޔަތްތަކުގެ ސަބަބުން އެ ބޭފުޅުންނަށް ވަރަށް ކުޑަ ރޭޓެއްގައި ލޯނު ނަގައިގެން ވިޔަފާރިން ވަރަށް ބޮޑު މަންފާއެއް އެބަ ކުރެވޭ،” ސިޔާމަށް އިޝާރާތް ކުރައްވަމުން ފަލާހު ވިދާޅުވި އެވެ.
ސިޔާމްގެ ބައެއް ރިސޯޓްތައް ހެދުމަށްޓަކައި އެކި ސަރުކާރުތަކުން އޭނާ އަށް މީގެ ކުރިން ސޮވަރިން ގެރެންޓީ ދީފައި ވެ އެވެ. ނަމަވެސް ސިޔާމްގެ ރިސޯޓެއް ތަރައްގީކުރަން ބޭނުންވާ 165 މިލިއަން ޑޮލަރު (2.5 ބިލިއަން ރުފިޔާ) ގެ ލޯނަކަށް ސަރުކާރުގެ ސޮވަރިން ގެރެންޓީ އަށް އެދިވަޑައިގަތަސް އެ ގެރެންޓީ ނުދޭން ސަރުކާރުން ވަނީ މިދިޔަ އޮގަސްޓް މަހު ނިންމައިފަ އެވެ.
ފަލާހު ވިދާޅުވީ، ހަގީގަތަކީ އެގޮތަށް ފަށާ ވިޔަފާރިތަކުގައި ވެސް ދިވެހިންނަށް އެކަށީގެންވާ ރަނގަޅު ފުރުސަތުތައް ނެތް ކަމަށާއި އެކަށީގެންވާ މުސާރަ ދީގެން ފުރުސަތު ފަހިކޮށްދޭ ނަމަ ދައުލަތަށް ބުރަ ކުޑަވާނެ ކަމަށެވެ.
ރާއްޖޭގައި ނަގާ ޓެކްސް ކުރިއަރާފައިވާ ގައުމުތަކަށް ވުރެ ވެސް ބޮޑު ކަމަށް ސިޔާމް ވިދާޅުވި ވާހަކައަށް ރައްދު ދެއްވައި ފަލާހު ވިދާޅުވިގޮތުގައި، ދުނިޔޭގެ ނިސްބަތަށް ބަލާއިރު ވެސް ޓޫރިޒަމް ދާއިރާ އިން ނެގޭ ޓެކްސް ކުޑަ އެވެ.
