ދުނިޔޭގެ ފަތުރުވެރިކަމުގެ ދާއިރާގައި ދެވޭ އެންމެ ޝަރަފުވެރި އެއް އެވޯޑު ކަމަށްވާ ވޯލްޑް ޓްރެވަލް އެވޯޑްސްގެ އިންޑިއަން އޯޝަން ސެގްމެންޓުގެ “އިންޑިއަން އޯޝަންސް ލީޑިންގ އެއަރޕޯޓް 2026” ގެ އެވޯޑް ވެލާނާ އިންޓަނޭޝަނަލް އެއާރޕޯޓް (ވީއައިއޭ) އިން ކާމިޔާބުކޮށްފިއެވެ.
ކްރޮސްރޯޑްސް މޯލްޑިވްސްގައި ބޭއްވި ވާރލްޑް ޓްރެވަލް އެވޯޑްސް އޭޝިއާ، އޯޝޭނިއާ އެންޑް އިންޑިއަން އޯޝަން ގާލާ ސެރެމަނީ ގައި ވީއައިއޭގެ ފަރާތުން މި އެވޯޑާ ހަވާލުވެވަޑައިގަތީ މޯލްޑިވްސް އެއާޕޯޓްސް ކޮމްޕެނީ ލިމިޓެޑް (އެމްއޭސީއެލް) ގެ ސީއީއޯ އަދި މެނޭޖިންގ ޑިރެކްޓަރ އިބްރާހީމް ޝަރީފް މުޙައްމަދެވެ. މިއީ އިންޑިއަން އޯޝަންގެ ލީޑިންގ އެއާޕޯޓުގެ ޝަރަފު ވީއައިއޭ އިން ކާމިޔާބުކުރި 13 ވަނަ ފަހަރެވެ.
މިއަހަރުގެ އިންޑިއަން އޯޝަންސް ލީޑިންގ އެއާރޕޯޓް ކެޓަގަރީގެ އެވޯޑަށް ވީއައިއޭގެ އިތުރުން މަޑަގަސްކަރައިގެ އިވާޓޯ އިންޓަރނޭޝަނަލް އެއާރޕޯޓްއާއި، ރީޔޫނިއަންގެ ރޯލަންޑް ގަރޯސް އެއާރޕޯޓްއާއި، ސީޝެލްސް އިންޓަރނޭޝަނަލް އެއާރޕޯޓް އަދި މޮރިޝަސްގެ ސަރ ސީވޫސަގުރ ރާމްގޫލަމް އިންޓަރނޭޝަނަލް އެއާރޕޯޓް ވާދަކޮށްފައިވެއެވެ.
މޯލްޑިވްސް އެއާރޕޯޓްސް ކޮމްޕެނީ ލިމިޓެޑް (އެމްއޭސީއެލް) އިން ހިންގަމުން އަންނަ ވީއައިއޭ އަށް މި އެވޯޑު ލިބުމަކީ، އެއާރޕޯޓުގެ އޮޕަރޭޝަންތަކާއި ދަތުރުވެރިންނަށް ފޯރުކޮށްދޭ ޚިދުމަތްތައް ދެމެހެއްޓެނިވި ގޮތެއްގައި ކުރިއަރަމުން އަންނަކަމުގެ ހެއްކެއް ކަމަށް އެ ކުންފުނިން ވަނީ ވިދާޅުވެފައެވެ.އަދި މިއީ ރާއްޖެއަށް ޒިޔާރަތްކުރާ ފަތުރުވެރިންނަށާއި އެންމެހައި ދަތުރުވެރިންނަށް އެންމެ މަތީ ފެންވަރުގެ ޚިދުމަތެއް ފޯރުކޮށްދިނުމަށް ކުރަމުންދާ މަސައްކަތްތަކަށާއި، ގައުމީ ފަތުރުވެރިކަމުގެ ސިނާއަތަށް ލިބުނު ފަޚުރުވެރި ކާމިޔާބީއެކެވެ.
“މިއީ މުވައްޒަފުން ކުރި ބުރަ މަސައްކަތާއި، ވީއައިއޭގެ ތަރައްޤީއަށް ގެންނަމުންދާ ހެޔޮ ބަދަލުތަކުގެ އިތުރުން ޕާޓްނަރުންގެ ފަރާތުން ލިބޭ އަގުހުރި އެއްބާރުލުމުގެ ނަތީޖާ، އަދި ރާއްޖޭގެ މައި ދޮރާށީގެ ހައިސިއްޔަތުން، ޚިދުމަތުގެ ފެންވަރު މަތިކޮށް، ދަތުރުވެރިންގެ ތަޖުރިބާ އިތުރަށް ފުރިހަމަކުރުމާއެކު، ވީއައިއޭ އަކީ ބައިނަލްއަގުވާމީ ފެންވަރުގައި ވާދަކުރެވޭނެ ޒަމާނީ އެއާރޕޯޓަކަށް ހެދުމަށް އަބަދުވެސް އިސްކަންދެއްވާނެ. ވީއައިއޭގެ އުމްރާނީ ތަރައްގީއާއި ޚިދުމަތްތައް ފުޅާކުރުމުގެ މަސައްކަތްތައް މެދުކެނޑުމެއްނެތި ކުރިއަށްދާއިރު، ދަތުރުވެރިންގެ ތަޖުރިބާ އިތުރަށް ފުރިހަމަކުރުމަށްޓަކައި ޓާމިނަލްގެ އެކި ސަރަހައްދުތަކަށް ޒަމާނީ އައު ވަސީލަތްތަކާއި ޚިދުމަތްތައް ދަނީ އިތުރުކުރެވެމުން. މިގޮތުން ގެނެވޭ ހެޔޮ ބަދަލުތަކާއެކު، އޮޕަރޭޝަންތައް އިތުރަށް ހަރުދަނާވެ، އެއާރޕޯޓުން ޚިދުމަތް ހޯދާ ކޮންމެ ދަތުރުވެރިއަކަށްވެސް ލުއިފަސޭހަ އަދި ހިތްފަސޭހަ މާހައުލެއް ކަށަވަރުވެގެންދާނެ” އެމްއޭސީއެލްގެ ސީއީއޯ އަދި މެނޭޖިންގ ޑިރެކްޓަރ އިބްރާހީމް ޝަރީފް މުޙައްމަދު ވިދާޅުވިއެވެ.
