ރަސްމާލޭގައި 20 ބިލިއަން ޑޮލަރުގެ މަޝްރޫއެއް ހިންގަން އަބޫދާބީގެ “އީގަލް ހިލްސް” އާ އެކު އެއްބަސްވުމެއްގައި ސޮއިކޮށްފިއެވެ.
މި އެއްބަސްވުމުގައި ސޮއިކުރުމުގެ ރަސްމިއްޔާތުގައި އީގަލް ހިލްސްގެ ބާނީ އަދި ޗެއާމަން މުހައްމަދު އަލައައްބާރުއާއި ދިވެހި ސަރުކާރުގެ އިސްވެރިން ބައިވެރިވެވަޑައިގަނެފައިވެއެވެ. މި މަޝްރުއަކީ ދިވެހިރާއްޖޭގައި މިހާތަނަށް ހިންގާ ބޭރުގެ އެންމެ ބޮޑު މަޝްރޫއުކަމަށް އެބޭފުޅުން ވަނީ ވިދާޅުވެފައެވެ.
މި އެއްބަސްވުމުގެ ދަށުން 20 ބިލިޔަން ޑޮލަރުގެ ވޯޓަރފްރަންޓް އަދި މެރީނާ ޕްރޮޖެކްޓެއް ތަރައްގީކުރުމަށް ވަނީ ހަމަޖެހިފައެވެ. މިއާއެކު، ބައިނަލްއަގްވާމީ ފެންވަރުގެ ހޮޓާތަކާއި ރިސޯޓުތައް، މަތީ ފަންތީގެ ބްރޭންޑެޑް ރެޒިޑެންސްތައް ތަރައްގީ ކުރުމަށް ވަނީ ނިންމާފައެވެ. އަދި ދުނިޔޭގެ ފެންވަރުގެ މެރީނާއެއް، ވޯޓަރފްރަންޓް ޕްރޮމެނާޑްތައް، ރެސްޓޯރެންޓްތައް، ފިހާރަތައް އަދި ހިތްހަމަޖައްސައިލުމާއި ދުޅަހެޔޮކަމުގެ މަރުކަޒުތައް ގާއިމުކުމަށްވެސް ނިންމާފަވެއެވެ.
މި އެއްބަސްވުމުގައި ސޮއިކުރި ރަސްމިއްޔާތުގައި ވާހަކަ ދައްކަމުން ހައުސިން މިނިސްޓަރު މުއްތަލިބް ވަނީ މި މަޝްރޫއުގެ ސަބަބުން 54،000 އަށް ވުރެ ގިނަ ވަޒީފާ އުފެދޭނެ ކަމަށް ވިދާޅުވެފައެވެ. އަދި ސަރުކާރަށް ލިބޭ އާމްދަނީ ވެސް އިތުރުވެގެން ދާނެކަމަށް ވިދާޅުވެފައެވެ.
މި މަޝްރޫއާއެކު ރާއްޖެއަށް 30 ބިލިޔަން ޑޮލަރަށް ވުރެ ގިނަ ބޭރުގެ އިންވެސްޓްމަންޓް ލިބި، ސާފު ފޮރިން އިންވެސްޓްމަންޓްގެ ގޮތުގައި ގާތްގަނޑަކަށް 18 ބިލިޔަން ޑޮލަރު ވަންނާނެކަމަށް ވަނީ ލަފާކޮށްފައެވެ. ފަތުރުވެރިކަމުގެ ދާއިރާއިން ވެސް އަހަރަކު2 ބިލިއަން ޑޮލަރަށް ވުރެ ގިނަ އާމްދަނީއެއް ވަންނާނެ ކަމަށް ވެސް ވަނީ ލަފާކޮށްފައެވެ.
