ވެރިކަން ކުރާ ޕީޕަލްސް ނޭޝަނަލް ކޮންގްރެސް (ޕީއެންސީ) ގެ އެތެރޭގެ ބޮޑު އިންތިޚާބުގައި ޕާޓީގެ އެކި މަޤާމުތަކަށް 2,500 އަށްވުރެ ގިނަ ކެންޑިޑޭޓުން ވާދަކުރާނެކަން އެ ޕާޓީން ހާމަކޮށްފިއެވެ.
އިންތިޚާބާ ބެހޭ އެންމެ ފަހުގެ މަޢުލޫމާތު ދިނުމަށް މިއަދު ބޭއްވި ނޫސްވެރިންގެ ބައްދަލުވުމުގައި ޕީއެންސީގެ ތަރުޖަމާނު މުޙައްމަދު ފިރުޒުލް ވިދާޅުވީ، ވޯޓުލުން ކުރިއަށްދާނީ ހޮވަންޖެހޭ އަދަދަށްވުރެ ކުރިމަތިލީ ކެންޑިޑޭޓުންގެ އަދަދު އިތުރުވި ދާއިރާތަކުގައި އެކަނި ކަމަށެވެ.
“މި އިންތިޚާބު މުޅި ރާއްޖޭގައި ނިމިގެންދާއިރު، ޕާޓީގެ އެކި ހަރަކާތްތަކުގައި އިސްކޮށް އުޅޭނެ 2,500 އަށްވުރެ ގިނަ މީހުން މަޤާމުތަކަށް ހޮވިގެންދާނެ ކަމީ ލިބޭ ވަރަށް ބޮޑު އުފަލެއް. މިއީ ޕާޓީއަށް ލިބޭނެ ވަރަށް ބޮޑު ކުރިއެރުމެއް،”
އަތޮޅުތަކުގެ އިތުރުން މާލޭގައި ވެސް ވޯޓުލުން ކުރިއަށްދާއިރު، މި އިންތިޚާބުގައި ވޯޓުލެވޭ މީހުންގެ ލިސްޓު މިހާރު ވަނީ އާންމުކޮށްފައެވެ. ފިރުޒުލް ވިދާޅުވި ގޮތުގައި ލިސްޓަށް ޝަކުވާ ހުށަހެޅުމުގެ އިތުރުން، އިންތިޚާބާ ގުޅުންހުރި އެކި މައްސަލަތަކާ ބެހޭ ޝަކުވާތައް ވެސް ޕާޓީގެ ޕޯޓަލް މެދުވެރިކޮށް ހުށަހެޅުމުގެ ފުރުސަތު ހުޅުވާލެވޭނެއެވެ.
