ދޮގު މަޢުލޫމާތު ފެތުރުމަކީ ޒިންމާދާރުކަން ކުޑަ އަމަލެއް ކަމަށާއި، ހަގީގަތް ހާމަކުރުމަކީ މަޖުބޫރުކަމެއް ކަމަށް މިނިސްޓަރ އޮފް ޔޫތު އެމްޕަވަރމަންޓް، ސްޕޯޓްސް އެންޑް ފިޓްނަސް ޢަބްދުﷲ ރާފިއު ވިދާޅުވެއްޖެއެވެ.
ރައީސުލްޖުމްހޫރިއްޔާ ޑރ. މުޙައްމަދު މުއިއްޒަށް އަމާޒުކޮށް “އަދަދު” ނޫހުން ތައްޔާރުކޮށްފައިވާ “އައިޝާ” ޑޮކިއުމެންޓްރީއާ ގުޅިގެން ފުލުހުން އެ ނޫހުގެ އޮފީސް ބަލައި ފާސްކުރަން ފަށާފައިވާއިރު، މި މައްސަލައިގައި ރާފިއު ވަނީ ނޫސްވެރިކަމުގެ އަޚުލާގީ މިންގަނޑުތައް ހިފެހެއްޓުމަށް ގޮވާލައްވާފައެވެ.
މިދިޔަ މާރިޗު މަހު “އަދަދު” ނޫހުން އާންމުކުރި މި ޑޮކިއުމެންޓްރީއާ ގުޅިގެން ފުލުހުން ރޭ އެ ނޫހުގެ އޮފީހަށް ވަދެ ބަލައި ފާސްކޮށްފައިވާއިރު، އެ ތަނުގައި ހުރި ބައެއް ސާމާނު ފުލުހުންގެ ބެލުމުގެ ދަށަށް ގެންގޮސްފައިވާ ކަމަށް އެ ނޫހުން ބުނެފައިވެއެވެ. ފުލުހުން ވިދާޅުވީ މިއީ ތަހުގީގު ކުރަމުންދާ މައްސަލައަކާ ގުޅިގެން ހިންގާ ހަރަކާތެއް ކަމަށެވެ.
މި މައްސަލައާ ގުޅޭގޮތުން ވަޒީރު ރާފިއު މިއަދު ކުރެއްވި އެކްސް ޕޯސްޓެއްގައި ވިދާޅުވީ، ހަގީގަތަކީ އިޚުތިޔާރީ ކަމަކަށް ވެގެން ނުވާނެ ކަމަށާއި، ޒިންމާދާރުކަމާއި ސައްހަ މަޢުލޫމާތު ފެތުރުމަކީ ނުހަނު މުހިންމު ކަމެއް ކަމަށެވެ.
“ދޮގު ވާހަކަތަކާއި ހަގީގަތާ ޚިލާފު ވާހަކަތަކުގެ މައްޗަށް ބިނާކޮށް ފަތުރާ މަޢުލޫމާތަށްވުރެ ރަނގަޅު މަޢުލޫމާތު އާންމުންނަށް ލިބެންޖެހޭ. މިއަށްވުރެ ރަނގަޅަށް މަސައްކަތްކޮށް، ރަނގަޅަށް ރިޕޯޓްކުރަންޖެހޭ. ހަގީގަތް ހާމަކުރުމަކީ ހަމައެކަނި އޮންނަ އާދައެއް ނޫން، އެއީ ޒިންމާއެއްވެސްމެ،” ވަޒީރު ރާފިއު ވިދާޅުވިއެވެ.
މި މައްސަލައިގައި ރައީސް އޮފީހުގައި އިއްޔެ ބޭއްވި ނޫސްވެރިންގެ ބައްދަލުވުމުގައި، “އަދަދު” ނޫހުގެ ނޫސްވެރިއަކު ކުރި ސުވާލަކަށް ޖަވާބު ދެއްވަމުން ރައީސް މުއިއްޒު ވިދާޅުވީ އެ ވީޑިއޯގައި ހުރީ ކަނޑައެޅިގެން ދޮގު ވާހަކަތަކެއް ކަމަށެވެ. އަދި އެފަދަ ދޮގު ވާހަކަ ހިމެނޭ ވީޑިއޯއެއް އުފެއްދި ކަމަށް ނޫހުން އަމިއްލައަށް އިއުތިރާފުވެފައިވާ ކަމަށް ފާހަގަކުރައްވައި، އެކަމުގައި ބައިވެރިވި ހުރިހާ ފަރާތްތަކަކަށް ދައުވާކޮށްދިނުމަށް ކަމާބެހޭ މުއައްސަސާތަކުގައި ރައީސް ވަނީ އެދިވަޑައިގެންފައެވެ.
“އަދަދު” ނޫހުން ނެރުނު މި ޑޮކިއުމެންޓްރީގެ މައްސަލަ މީޑިއާ ކައުންސިލުންވެސް މިހާރު ދަނީ ބަލަމުންނެވެ. މި މައްސަލައަކީ ދިވެހި މީޑިއާގެ މިނިވަންކަމާއި ޒިންމާދާރުކަމާ ގުޅޭގޮތުން ބޮޑެތި ބަހުސްތަކެއް އުފެދިފައިވާ މައްސަލައެކެވެ.
