ނޫސްވެރިކަމުގެ މިނިވަންކަމަކީ ކޮންމެ މީހަކަށްމެ އޮންނަންޖެހޭނެ ހައްގެއް ކަމަށްވީ ނަމަވެސް، އެ ހައްގުގެ ބޭނުން ހިފަންވާނީ ވަކި ހައްދެއްގެ ތެރެއިން ކަމަށް ތިނަދޫ ދެކުނު ދާއިރާގެ މެންބަރު އަލްސަން އަހުމަދު ވިދާޅުވެއްޖެއެވެ.
މެންބަރު އަލްސަން މިފަދައިން ވިދާޅުވީ، “އަދަދު” ނޫހުން އާންމުކުރި “އައިޝާ” ޑޮކިއުމެންޓްރީއާ ގުޅިގެން ފުލުހުން އެ ނޫހުގެ އޮފީސް ބަލައި ފާސްކުރަން ފެށުމާ ގުޅިގެން ކުރެއްވި ސޯޝަލް މީޑިއާ ޕޯސްޓެއްގައެވެ.
މެންބަރު ވިދާޅުވީ، މީހުންގެ އަބުރު ކަތިލުމާއި ޒިނޭގެ ދޮގު ތުހުމަތު އެޅުވުން ފަދަ ބޮޑެތި ފާފަތަކަކީ އެއީ ތިމާގެ މިނިވަންކަން ކަމުގައި ދެކި އަނެކާގެ ހައްގަށް އަރައިގަތުމަކީ އެއްވެސް ހާލެއްގައި ބަލައިގަނެވޭނެ ކަމެއް ނޫން ކަމަށެވެ. އަދި ކޮންމެ ފަރުދަކަށް ލިބިފައިވާ މިނިވަންކަން އިސްލާމީ ރިވެތި މިންގަނޑުތަކުގެ ތެރެއިންނާއި ގާނޫނީ އިމުގެ ތެރެއިން ގެންގުޅުމަކީ އެންމެ ރިވެތި ގޮތް ކަމަށް އޭނާ ފާހަގަކުރެއްވިއެވެ.
“ނޫސްވެރިކަމުގެ މިނިވަންކަމަކީ އޮންނަން ޖެހޭނެ ހައްގެއް. ނަމަވެސް ކޮންމެ ހައްގެއްގައިވެސް ހައްދެއް އޮންނަންވާނެ. މީހުންގެ އަބުރު ކަތިލުމާއި ޒިނޭގެ ދޮގު ތުހުމަތު އެޅުވުން ފަދަ ބޮޑެތި ފާފައަކީ އެއީ ތިމާގެ މިނިވަންކަން ކަމުގައި ދެކި އަނެކާގެ ހައްގަށް އަރައިގަތުމަކީ އެެއްވެސް ހާލެއްގައި ބަލައިގަނެވޭނެ ކަމެއް ނޫން. ކޮންމެ ފަރުދަކަށްވެސް ލިިބަފައިވާ މިނިވަންކަން އިސްލާމީ ރިވެތި މިންގަނޑުތަކުގެ ތެރެއިން އަދި ގާނޫނީ އިމުގެ ތެރެއިން ގެންގުޅުމަކީ ރިވެތި ގޮތް. ދޮގު ޚަބަރު ފެތުރުމާއި މީހުންގެ އަބުރު ކަތިލުމާ ދެކޮޅު.” އަލްސަން ވިދާޅުވިއެވެ.
ރައީސުލްޖުމްހޫރިއްޔާ ޑރ. މުހައްމަދު މުއިއްޒަށް އަމާޒުކޮށް މިދިޔަ މާޗް މަހު “އަދަދު” ނޫހުން ނެރުނު މި ޑޮކިއުމެންޓްރީގެ މައްސަލަ ފުލުހުންގެ ސީރިއަސް އެންޑް އޯގަނައިޒްޑް ކްރައިމް ޑިޕާޓްމަންޓުން އަންނަނީ ތަހުގީގު ކުރަމުންނެވެ. މި ތަހުގީގަށް އެ ނޫހުގެ އޮފީސް ބަލައި ފާސްކޮށް، ގިނަ އަދަދެއްގެ ސާމާނު ފުލުހުންގެ ބެލުމުގެ ދަށަށް ވަނީ ގެންގޮސްފައެވެ.
މީގެ އިތުރުން، މި މައްސަލައިގައި “އަދަދު” ނޫހުގެ ސީއީއޯ ހުސައިން ފިޔާޒް މޫސާގެ ޕާސްޕޯޓު ހިފަހައްޓައި، އަންނަ ޖުލައި މަހުގެ 26 ވަނަ ދުވަހުގެ ނިޔަލަށް އޭނާ ރާއްޖެއިން ފުރުން ވަނީ މަނާކޮށްފައެވެ.
މި މައްސަލައާ ގުޅިގެން ރައީސް މުއިއްޒު ވިދާޅުވެފައިވަނީ އެ ވީޑިއޯގައި ހުރީ ކަނޑައެޅިގެން ދޮގު މައުލޫމާތު ކަމަށާއި، އެފަދަ ދޮގު ވާހަކަތައް ފަތުރާ ފަރާތްތަކާ މެދު ދައުވާކޮށްދިނުމަށް އެދިވަޑައިގަންނަވާ ކަމަށެވެ. މޯލްޑިވްސް މީޑިއާ ކައުންސިލުން ވެސް މިހާރު އަންނަނީ މި މައްސަލަ އިތުރަށް ބަލަމުންނެވެ.
